Grats qalasyndaǵy mektepke shabýyl jasaǵan kúdikti qoshtasý hatyn qaldyrǵan

ASTANA. KAZINFORM — Avstrııalyq polıtseıler gımnazııa oqýshylaryn atyp óltirgen er adamnyń úıinen qoshtasý hatyn taýyp aldy. Hat mazmunyna qaraǵanda, ol ózin mobbıng (ujym tarapynan júıeli qysym) qurbany dep sanaǵan, dep jazdy DW saıty.

10 maýsym kúni Avstrııanyń Grats qalasyndaǵy Draıshıýttsengasse gımnazııasynda qarýly shabýyl jasaǵan er adam Grats-Ýmgebýng aýdanyndaǵy úıinde qoshtasý hatyn qaldyrǵan. Bul týraly Krone Zeitung gazeti polıtsııa taratqan aqparatqa súıene otyryp habarlaǵan.

Avstrııalyq BAQ pen polıtsııa shabýyldaýshynyń jeke basyna qatysty tyń málimetter jarııalady. Artýr A. — Avstrııa azamaty. Buǵan deıin eldiń ishki ister mınıstri Gerhard Karner baspasóz máslıhatynda Artýr A.-nyń dál osy gımnazııada oqyǵanyn, biraq oqýyn aıaqtamaǵanyn aıtqan bolatyn.

Qoshtasý hatynan belgili bolǵandaı, Artýr ózin uzaq ýaqyt boıy júıeli qysym men psıhologııalyq zorlyqqa ushyraǵan adam retinde sezingen. Buǵan deıin birneshe BAQ osyndaı jaǵdaıdyń qandy shabýylǵa sebep bolýy múmkin ekendigin jazǵan edi.

Osyǵan baılanysty Grats qalasynda aldaǵy úsh kún ishinde barlyq mádenı, merekelik is-sharalar men saıası partııalardyń sezderi toqtatyldy. El boıynsha úsh kúndik ulttyq aza tutý jarııalandy.

Germanııadaǵy birneshe telearna da bul qaıǵyly oqıǵaǵa baılanysty óz efır kestelerin ózgertip, 10 maýsym keshinde Gratstaǵy mektepke jasalǵan shabýyl týraly arnaıy baǵdarlamalar men reportajdar kórsetti.

Eske sala keteıik, mekteptegi atys seısenbi kúni shamamen saǵat 10-da bastaldy. Oqıǵa bolǵan jerde 9 adam óltirildi. Olardyń altaýy áıel, úsheýi er adam. Alaıda olardyń qanshasynyń bala, qanshasynyń eresek ekeni belgisiz bolyp otyr. Keshirek taǵy eki adam alǵan jaraqattarynyń aýyrlyǵynan kóz jumdy.