Granttyq qarjylandyrýdy arttyrý ǵylymdaǵy jastarǵa qanat bitiredi - sarapshy
«Elbasynyń qatysýymen Jastar jylynyń saltanatty túrde ashylýy jastarǵa erekshe jalyn ári jiger syılaǵandaı boldy. Sebebi, memleket tarapynan qolǵa alynatyn mundaı is-sharalarǵa jastardyń suranysy joǵary. Birinshiden, búgingi tańda elimizde jastardyń ózara jeke bir qalyptasqan ortasy baryn atap ótý kerek. Elimizdegi jas órenderdiń árbir salada jetkilikti dárejede jeńisterge jetkenin, bilikti maman bolyp qalyptasyp qalǵanyn ýaqyttyń ózi kórsetip otyr. Jıyn barysynda dúıim jurt kórgendeı, ártúrli salada, ǵylym men aýyl sharýashylyǵy, mádenıet pen sport bolsyn - belgili bir dárejede jastardyń bıik asýlardy baǵyndyrǵan shoǵyry qalyptasyp qalǵanyn aıqyn kórdik», - deıdi sarapshy.
«Bolashaq» stıpendııasynyń túlegi Baýyrjan Baǵlaıdyń aıtýyna qaraǵanda, elimizdiń jas býyndy qoldaý maqsatynda bıyl birshama is-shara qabyldanǵan.
«Bul tek is-sharalar aýqymy tek bir baǵytty ǵana qamtyp otyrǵan joq. ıAǵnı, jastardy ekonomıkalyq, áleýmettik turǵyda jáne basqa da jaǵynan jan-jaqty qoldaýdyń sharalary bekitilip otyr. Elbasy jastardyń jeke usynystaryn tapsyrma berý arqyly qoldap, olardyń oı-pikirimen sanasyp otyr. Memleketti damytýda jastar men Úkimettiń arasyndaǵy tyǵyz qarym-qatynas kúsheıe tústi. Jıynda baıqaǵanyńyzdaı, format óte erkin boldy. Jastar Elbasyn, Elbasy jastardy tyńdady», - deıdi ol.
Baýyrjan Baǵlaıdyń ózi de ǵylym salasynda júrgendikten, jas ǵalymdardy qoldaý tetikteri baǵytyndaǵy Memleket basshysynyń tapsyrmasy ýaqyttyń talaby dep biledi.
«Jastardyń zertteýlerine qosymsha aqsha bólý arqyly jastardyń ǵylymı áleýetine joǵary baǵa berildi. Ǵylym salasynda tek qalyptasqan ǵalymdarǵa ǵana emes, jańa zamannyń jas ǵalymdaryna da sóz berilip otyr. Meniń oıymsha, jastardyń ǵylymyna, zertteýlerine qosymsha qarajat bólý - irgeli jáne qoldanbaly ǵylymnyń damýyna aıtarlyqtaı úles qosatyn katalızator bola alady», - deıdi sarapshy.
Onyń aıtýynsha, Nazarbaev ýnıversıtetiniń qalyptasqan keshendi baǵdarlamasy men «Bolashaq» baǵdarlamasy usynatyn sheteldik oqý taǵylymdamalary - jastardyń ǵylymyna tyń serpin ákelýge ábden qaýqarly.
«Jastar jyly - jas ǵalymdarǵa erekshe jańalyq ákeldi. Jastar jyly meniń oıymsha, jastardyń áleýmettik, ekonomıkalyq jáne ózge de kúndelikti qıyndyqtaryn sheshýdiń tıimdi joldaryn qarastyrady», - deıdi Baýyrjan Baǵlaı.
Eske sala ketsek, kúni keshe Prezıdenttiń qatysýymen Qazaqstanda Jastar jyly resmı túrde bastalǵan bolatyn. Memleket basshysy Astanada uıymdastyrylǵan «Táýelsizdik urpaqtary» atty saltanatty sharada jas mamandar men otbasylardy qoldaýǵa qatysty birqatar tapsyrmalardy júktegen edi.
Aıta ketsek, Jastar jylynyń ashylý saltanatynda Elbasy Úkimetke jas ǵalymdardyń irgeli jáne qoldanbaly zertteýine bólinetin granttyq qarjylandyrýdy jyl saıyn 3 mlrd teńgege arttyrýdy tapsyrǵan bolatyn.
Foto: assembly.kz
