Grantqa ilikpegen talapkerler úshin qosymsha múmkindikter qarastyrylǵan — Janna Esinbaeva
ASTANA. KAZINFORM — Bıylǵy negizgi konkýrs qorytyndysy boıynsha 77 myńnan astam talapker memlekettik bilim grantyna ıe boldy. Alaıda, grantqa qol jetkizbegen túlekter úshin de joǵary bilim alýdyń ózge joldary bar. Bul týraly Joǵary jáne joǵary oqý ornynan keıingi bilim komıteti tóraǵasynyń orynbasary Janna Esinbaeva Jibek Joly telearnasynyń «Búgin LIVE» baǵdarlamasynda málimdedi.
— Negizgi konkýrs respýblıkalyq bıýdjetten bólinetin granttar negizinde ótti. Sonymen qatar jergilikti atqarýshy organdar tarapynan da granttar qarastyrylǵan. Bıyl olardyń sany 1 700-den asty. Árbir ákimdik óńirlik qajettilikke baılanysty óz granttaryn bóledi. Talapkerlerge osy konkýrstarǵa qujat tapsyrýǵa keńes aıtamyz, — dedi Janna Esinbaeva.
Onyń aıtýynsha, jergilikti granttarǵa qujat qabyldaý 15 tamyzǵa deıin jalǵasady. Aqparat ár ákimdiktiń resmı saıtynda nemese óńirlik joǵary oqý oryndarynyń qabyldaý komıssııalarynda qoljetimdi.
Komıtet ókili rektorlyq granttar men qaıyrymdylyq uıymdary usynatyn qoldaýǵa da toqtaldy.
— Joǵary oqý oryndary talantty jastarǵa, «Altyn belgi» ıegerlerine, mektepti úzdik bitirgenderge jáne áleýmettik osal toptaǵy talapkerlerge rektorlyq granttar beredi. Al «Qazaqstan halqyna» qory bıyl 500 grant bóldi. Bul granttar ákimdik konkýrstarynan keıin usynylady, — dedi ol.
Sondaı-aq saralanǵan granttar da bar.
— Memleket 2 jyldan beri pedagogıkalyq jáne áleýmettik ǵylymdarǵa 300 saralanǵan grant bólip keledi. Onyń 50 paıyzyn memleket, qalǵanyn stýdenttiń ózi tóleıdi. Konkýrs qyrkúıekte ótedi. Mundaı grant ıegerlerine stıpendııa beriledi jáne oqý bitirgen soń memleket esebinen jumsalǵan qarjyny óteý úshin belgili bir merzim jumys isteý mindeti júkteledi, — dep túsindirdi Janna Esinbaeva.
Mamannyń aıtýy boıynsha bıylǵy memlekettik granttardyń basym bóligi suranysqa ıe tehnıkalyq mamandyqtarǵa bólingen.
— Granttardyń 60 paıyzy ınjenerlik baǵytqa berildi. Atap aıtqanda, ınjenerııa — 18 myń, aqparattyq-kommýnıkatsııalyq tehnologııalar — 11 myńnan astam, pedagogıkalyq mamandyqtar — 13 myńnan astam grant. Jasandy ıntellekt pen robototehnıka baǵyttaryna da erekshe nazar aýdaryldy, — dedi komıtet tóraǵasynyń orynbasary.
Buǵan deıin, memlekettik bilim granttary ıegerleriniń tizimi jarııalanǵanyn jazǵanbyz.