Grantqa ilige almaǵan talapkerlerge qandaı múmkindik bar
ASTANA. KAZINFORM — Bıyl grant konkýrsyna qatysyp, memlekettik bilim grantyna ıe bola almaǵan talapkerler úshin birneshe balama múmkindik qarastyrylǵan.
Bul týraly Joǵary jáne joǵary oqý ornynan keıingi bilim komıteti tóraǵasynyń orynbasary Janna Esenbaeva Jibek Joly telearnasyndaǵy «Búgin LIVE» baǵdarlamasynda aıtty.
Janna Esenbaevanyń aıtýynsha, negizgi grant konkýrsynyń aıaqtalýy talapkerler úshin bilim alýdyń basqa múmkindikteri joq degendi bildirmeıdi.
Onyń aıtýynsha, birinshiden jergilikti atqarýshy organdar bóletin bilim granttary bar. Bıyl ákimdikter tarapynan 2 myńnan astam grant qarastyrylǵan.
— Ákimdik granttary týraly aqparatty talapkerler óz óńirindegi joǵary oqý oryndarynyń qabyldaý komıssııalarynan nemese bilim basqarmalarynan ala alady. Eń bastysy qujat qabyldaý merzimin ótkizip almaý. Keıbir ákimdikter 10-12 tamyz aralyǵynda qujat qabyldap jatyr, endi birqatary 15 tamyzǵa deıin qabyldaıdy, — dedi Janna Esenbaeva.
Ekinshisi ol «Qazaqstan halqyna» qorynyń bilim granttary. Bıyl qor tarapynan 350 grant bólingen. Grantqa qoıylatyn negizgi talaptar qordyń resmı saıtynda jarııalanǵan. Sonymen qatar joǵary oqý oryndary usynatyn rektorlyq granttar bar.
— Joǵary oqý oryndary óz talaptaryna sáıkes bilim granttaryn qarastyrady. Kóbine «Altyn belgi» ıegerlerine, jetim balalarǵa, olımpıada júldegerlerine jáne áleýmettik osal toptaǵy talapkerlerge granttar beriledi. 100 jáne 50 paıyzdyq jeńildikter sııaqty múmkindikter bar. Bul týraly talapkerler ózderi tańdaǵan joǵary oqý ornynyń qabyldaý komıssııasyna habarlasa alady. Qazir qabyldaý komıssııalary jumys istep jatyr, — dedi komıtet tóraǵasynyń orynbasary.
Tórtinshi múmkindik — jumys berýshiler tarapynan bólinetin granttar. Mysaly, jyl saıyn «KazEnergy» kompanııasy oqý aqysyn tolyq óteıtin bilim granttaryn usynady. Budan bólek mınıstrlik bas tartylǵan memlekettik granttardy qaıta bólýdi josparlap otyr.
— Keıbir talapkerler ártúrli sebepterge baılanysty ózderine berilgen granttan bas tartyp jatady. Osyndaı jaǵdaıda bosap qalǵan granttardy qyrkúıek aıynyń sońyna deıin qaıta taǵaıyndaıtyn bolamyz. Ol úshin qujat tapsyrýdyń qajeti joq. Granttar konkýrs tiziminde kelesi turǵan talapkerlerge beriledi, — dedi Janna Esenbaeva.
Aıta keteıik, QR Ǵylym jáne joǵary bilim mınıstrligi 2026-2027 oqý jylyna arnalǵan memlekettik bilim berý granttarynyń ıegerleri tizimin jarııalady. Bıyl 75 myńnan astam talapker elimizdiń joǵary oqý oryndarynda tegin bilim alý múmkindigine ıe boldy.
