Grant, shákirtaqy, qos dıplom: Elimizde shetel ýnıversıtetteri ne úshin ashylyp jatyr
ASTANA. KAZINFORM – Ǵylym jáne joǵary bilim mınıstrliginiń habarlaýynsha, Qazaqstanda álemniń úzdik ýnıversıtetteriniń fılıalyn ashý birinshi kezekte otandyq joǵary oqý oryndaryn transformatsııalaýǵa, joǵary bilimniń sapasyn kóterýge baǵyttalǵan. Sáıkesinshe qazaqstandyq JOO-lardyń básekege qabilettiligin arttyratyn nátıje kútiledi.
«Elimizde sheteldik JOO-lardyń fılıaldaryn ashýdaǵy maqsat – qazaqstandyq joǵary bilim naryǵyn jandandyryp, ýnıversıtetter arasyndaǵy básekelestikti kúsheıtý jáne joǵary bilim sapasyn arttyrý. Qazaqstanda joǵary bilim salasyn álemdik deńgeıge shyǵarý jolynda 2018 jyly joǵary oqý oryndaryna keńeıtilgen derbestik berildi. Joǵary bilim salasyn úzdik álemdik tájirıbelerge súıene otyryp damytý jolyndaǵy kelesi mańyzdy qadam 2022 jyly Ǵylym jáne joǵary bilim mınıstrligin qurý boldy. Osy rette jańa mınıstrlikte joǵary oqý oryndaryn ınternatsıonaldandyrý mindeti júktelgen arnaıy basqarma quryldy», - dep jaýap berdi Janna Esinbaeva agenttik joldaǵan saýalǵa jaýap bere otyryp.
Onyń aıtýynsha, sol mindettiń biri elimizde úzdik sheteldik ýnıversıtetterdiń fılıaldaryn ashý.
«Fılıaldarda birinshi kezekte elimizdiń eńbek naryǵyndaǵy tapshy mamandyqtar oqytylady. Máselen, bıznes derekteriniń saraptamasy, IT, AI, data science, kosmofızıka, munaı jáne gaz tehnologııalary, bıotehnologııa, elektrotehnıka jáne energetıka, mehatronıka, qonaq úı-meıramhana bıznesi, logıstıka, hımııalyq tehnologııalar, sý sharýashylyǵy jáne melıoratsııa, óndiristik avtomattandyrý jáne robototehnıka, aýdarma isi taǵy sol sııaqty. Basqasha aıtqanda, fılıal ashylarda óńirlerdiń kadr máselesindegi naqty suranystaryna basymdyq beriledi», - deıdi ol.
Fılıaldardaǵy oqý baǵdarlamalary kóp jaǵdaıda sheteldik ýnıversıtetterdiń oqý baǵdarlamalary negizinde daıyndalatyndyqtan, stýdentterdi qabyldaý talaptaryn ózderi belgileıdi.
Fılıaldarda oqıtyn stýdentterge beriletin memlekettik oqý granttarynyń sany men tártibi respýblıkalyq bıýdjetten qarjylandyrylatyn joǵary nemese joǵary oqý ornynan keıingi bilimi bar kadrlardy daıarlaýǵa 2024 – 2025, 2025 – 2026, 2026 – 2027 oqý jyldaryna arnalǵan memlekettik bilim berý tapsyrysyn bekitý týraly Qazaqstan Respýblıkasy Ǵylym jáne joǵary bilim mınıstriniń 2024 jylǵy 18 naýryzdaǵy №118 buıryǵy negizinde belgilenedi.
Osy jaz boıy mınıstrliktiń jáne sheteldik ýnıversıtet ókilderinen quralǵan top óńirlerdi aralap, mektep túlekterine egjeı-tegjeı aqparat taratqan.
«Elimizdegi sheteldik ýnıversıtetterdiń fılıaldaryn támamdaǵan túlekterge qos dıplom (biri qazaqstandyq JOO-nyń úlgisinde, ekinshisi fılıal ashqan sheteldik ýnıversıtettiń úlgisinde) beriledi. Degenmen oqý baǵdarlamasynyń erekshelikterine qaraı keı jaǵdaılarda eki ýnıversıtettiń rektorlarynyń qoldary men mórleri basylǵan ortaq dıplom beriledi. Dıplom halyqaralyq deńgeıdegi qujat bolyp sanalady», - deıdi J. Esinbaeva.
Mınıstrliktiń málimetinshe, sheteldik JOO fılıalyna túsken grant ıelerine stıpendııa tólenedi jáne sheteldik JOO fılıaldarynyń deni qazaqstandyq JOO bazasynda ashylady.
«Jataqhana máselesi qazaqstandyq JOO jataqhanalary esebinen sheshiledi. Keı jaǵdaılarda laboratorııalar sheteldik seriktes esebinen qurylýda, máselen, Serikbaev atyndaǵy Shyǵys Qazaqstan tehnıkalyq ýnıversıteti negizinde ashylǵan Lý Ban sheberhanasy qytaılyq seriktes tarapynan 8 mln ıýan quraıtyn somaǵa qajetti qural-jabdyqpen jabdyqtalyp, kadrlary daıarlandy. Joǵaryda atalǵandaı, fılıaldardyń basym bóligi qazaqstandyq JOO-nyń negizinde qurylýda. Qarapaıym tilmen aıtqanda, fılıaldar eki ýnıversıtettiń birlesip qurýymen ashylady. Sondyqtan, qazaqstandyq seriktester fılıalǵa qajetti ǵımarat, óz ýnıversıtetiniń keıbir tehnıkalyq múmkindikterin usynady. Al sheteldik ýnıversıtet, óz kezeginde, oqý baǵdarlamasyn engizip, óz oqytýshylaryn alyp keledi», - deıdi Ǵylym jáne joǵary bilim mınıstrliginiń ókili.
Aıta keteıik, elimizdegi shetel ýnıversıtetin támamdaǵan túlekter Qazaqstanda jumys isteýge mindetteledi.
Buǵan deıin elimizde ashylyp jatqan shetel ýnıversıteti fılıaldarynda «Qazaq tili» jáne «Qazaqstan tarıhy» pánin oqytý mindetteletini týraly habarlaǵan edik.
