Grant qarajaty maqsatsyz jumsalǵan: Qostanaıda 1,38 mln teńge bıýdjetke qaıtaryldy
ASTANA. KAZINFORM — Qostanaı oblysynyń Áýlıekól aýdanynda memlekettik grant qarajatyn maqsatsyz paıdalaný faktisi anyqtaldy. Prokýratýranyń aralasýynan keıin memleketke keltirilgen 1,38 mln teńge zalal tolyq óteldi.
Áýlıekól aýdanynyń prokýratýrasy memlekettik granttardyń zańdy ári maqsatty paıdalanylýyna júrgizgen taldaý barysynda zańbuzýshylyqty anyqtaǵan.
2023 jyly azamatqa kásipkerlik bastamany júzege asyrý úshin 1 mln 380 myń teńge kóleminde memlekettik grant berilgen. Alaıda grant qarajatyna satyp alynǵan jabdyq is júzinde málimdelgen maqsatta paıdalanylmaǵan. Budan bólek, onyń tehnıkalyq sıpattamalary eseptik qujattarda kórsetilgen málimetterge sáıkes kelmegen.
Osy fakti boıynsha prokýratýra materıaldarynyń negizinde alaıaqtyq belgileri boıynsha sotqa deıingi tergep-tekserý bastaldy.
— Tergeý barysynda grant alýshy memleketke keltirilgen zalaldy tolyq ótep, 1,38 mln teńgeni bıýdjetke óz erkimen qaıtardy. Kinásin moıyndaýy, zalaldy erikti túrde óteýi jáne zańnamada kózdelgen ózge de mán-jaılar eskerilip, qylmystyq is qylmystyq qýdalaýdy boldyrmaıtyn negizder boıynsha toqtatyldy, — delingen habarlamada.
Prokýratýra memlekettik granttar naqty bıznes-jobalardy iske asyrý úshin beriletinin eske saldy. Bıýdjet qarajatyn maqsatsyz paıdalaný zańnamaǵa sáıkes jaýapkershilikke ákep soǵady.
Budan buryn kásipkerlerge arnalǵan grant baǵdarlamasyn jarnamalaǵan qyzylordalyq 3,5 jylǵa sottalǵanyn jazǵanbyz.
