Grant ıegerleriniń jelide qýanysh pen shattyqqa toly beınejazbalary tarady
ALMATY. KAZINFORM — Qýanysh pen kóz jas, aıqaı men shattyq — búgin qazaqstandyqtardyń jelileri dál osyndaı beınejazbalarǵa toly.
Búgin, 7 tamyz kúni Ǵylym jáne joǵary bilim mınıstrligi 2026-2027 oqý jylyna arnalǵan memlekettik bilim berý granttarynyń ıegerleri tizimin jarııalady. Bıyl 75 myńnan astam talapker elimizdiń joǵary oqý oryndarynda tegin bilim alý múmkindigine ıe boldy.
Bul kún konkýrs nátıjelerin taǵatsyzdana kútken myńdaǵan qazaqstandyq túlek úshin eń mańyzdy ári ýaıymǵa toly sátterdiń birine aınaldy.
Grant tizimi jarııalanǵan soń, áleýmettik jelilerde áserli beınejazbalar kóbeıip ketti. Talapkerler konkýrs nátıjesimen tanysqan sátterin kameraǵa túsirip, shynaıy emotsııalarymen ǵalamtorda bólisip jatyr. Bul — birneshe jyldan beri talapkerler arasynda qalyptastan trend.
Kóptegen otbasylar úshin bul kún shynaıy merekege aınaldy.
Kadrlardan túlekterdiń qýanyshtan kóz jasyna erik bergenin, al olarmen birge ata-analarynyń jáne dostarynyń qýanǵanyn kórýge bolady.
Keıbiri senbeı, nátıjeni birneshe ret qaıtalap oqysa, endi biri birden týǵan-týystaryna qońyraý shalyp, qýanyshty jańalyqpen bólisti.
Jeli qoldanýshylary da ómirdiń jańa kezeńine qadam basqan jastarǵa tabys tilep, quttyqtaý jazyp jatyr.
Mundaı beınerolıkterdi QR Ǵylym jáne joǵary bilim mınıstri Saıasat Nurbek ta jarııalap, memlekettik bilim berý grantynyń ıegerlerin joǵary oqý oryndaryna túsýimen quttyqtady.
— Memlekettik bilim berý grantynyń ıegerlerin jetistikterimen shyn júrekten quttyqtaımyz! Bul — talapkerlerdiń tabandy eńbegi men bilimge degen umtylysynyń jemisi. Aıtýly sáttiń qýanyshyn birge bólisip, jarqyn bolashaqqa nyq qadam basýlaryna tilektespiz! — dep jazdy Saıasat Nurbek.
Grant jeńip alǵan túlekter úshin kelesi kezeń — tańdaǵan JOO-ǵa qujat tapsyrý. Qazaqstannyń joǵary oqý oryndarynda qujattardy qabyldaý 2026 jyldyń 25 tamyzyna deıin jalǵasady.
Eske salaıyq, 2026-2027 oqý jylynda qaı salaǵa grant kóp bólingenin jazǵanbyz.
