Grant ıegerleriniń tizimi 10 tamyzǵa deıin jarııalanady
ASTANA. QazAqparat - Memlekettik bilim granttary ıegerleriniń tizimi 10 tamyzǵa deıin jarııalanady. Bul týraly Bilim granttaryn taǵaıyndaý jónindegi respýblıkalyq konkýrstyq komıssııasynyń otyrysynda QR Bilim jáne ǵylym vıtse-mınıstri Tahır Balyqbaev málim etti.
«Komıssııa otyrysynyń qorytyndylary shyǵarý jáne memlekettik grant ıegerleriniń tizimin jarııalaý 10 tamyzǵa deıin aıaqtalady. Komıssııa jumysy aıaqtalǵannan keıin bilim granttaryn taǵaıyndaýǵa qatysty jedel isterdi 20 tamyzǵa deıin Joǵary jáne JOO-nan keıingi bilim berý men halyqaralyq qatynastar departamentine aıaqtaýdy usynamyn», - dep atap ótti vıtse-mınıstri.
Aıta keteıik, búgin Bilim granttaryn taǵaıyndaý jónindegi respýblıkalyq konkýrstyq komıssııanyń jumysy bastaldy.
Komıssııa quramyna memlekettik organdardyń, bilim salasy kásipodaqtarynyń ókilderi, QR Ulttyq kásipkerler palatasy, Qazaqstannyń azamattyq alıansy jáne joǵary oqý oryndarynyń rektorlary engizilgen. Komıssııa otyrysynda Qazaqstannyń joǵary oqý oryndaryna qabyldaý boıynsha úlken daıyndyq jumysynyń qorytyndysy shyǵarylady.
Jalpy 2014-2015 oqý jylynda 34 165 grant, onyń ishinde 2 530 oryn JOO daıarlyq bólimderine, 31 635 grant 1-kýrsqa túsetinder úshin.
Kolledjderdi bitirgenderdi qoldaý maqsatynda qysqartylǵan oqý túrine 2 875 grant qarastyryldy.
«Bilim grantyn taǵaıyndaý konkýrsyna 69 624 talapker qatysýda. Qatysýshylar arasynda 1 732 «Altyn belgi» ıegerleri, 322 Nazarbaev zııatkerlik mektebiniń túlekteri, 179 jalpy bilim beretin pánder boıynsha halyqaralyq jáne respýblıkalyq olımpıadalardyń jeńimpazdary, 921 jalpy bilim beretin pánder boıynsha halyqaralyq jáne respýblıkalyq ǵylymı jumystardyń jeńimpazdary, 891 respýblıkalyq jáne halyqaralyq sporttyq jarystardyń jeńimpazdary qatysady. Olar bilim grantyn taǵaıyndaý barysynda basym quqyqtarǵa ıe», - deıdi QR Bilim jáne ǵylym vıtse-mınıstri Tahır Balyqbaev.
Barlyq berilgen qujattar belgilengen tártippen qarastyrylatyn bolady. Konkýrstyq irikteýdiń protsedýrasy tolyqtaı avtomattandyrylǵan. Onyń qorytyndysy BAQ betterinde jarııalanady.
