Grant ıegerleriniń oqý ornyn tańdaýy boıynsha bıyl Lev Gýmılev atyndaǵy Eýrazııa ulttyq ýnıversıteti 3075 stýdentimen kósh bastady
ASTANA. 2 qyrkúıek. QazAqparat - Keshe L.N.Gýmılev atyndaǵy Eýrazııa ulttyq ýnıversıtetiniń bas ǵımaraty alańynda Bilim kúnine arnalǵan saltanatty jıyn ótti, dep habarlady oqý ornynyń baspasóz ortalyǵy.
Saltanatty sharaǵa ýnıversıtet ujymy, bilim-ǵylym salasyndaǵy qurmetti qonaqtar qatysty. EUÝ rektory t.ǵ.d., professor E.Sydyqov ýnıversıtettiń oqytýshy-professorlary men stýdentterin jáne ýnıversıtet tabaldyryǵyn alǵash attaǵaly otyrǵan 1 kýrs stýdentterin «Bilim kúnimen» quttyqtaı otyryp, elimizdiń bolashaǵy - bilimdi, óreli jastardyń qolynda ekenin aıyryqsha atap ótti.
Grant ıegerleriniń oqý ornyn tańdaýy boıynsha bıyl Lev Gýmılev atyndaǵy Eýrazııa ulttyq ýnıversıteti 3075 stýdentimen kósh bastady. Onyń ishinde 906-sy «Altyn belgi» ıegeri, 132-si respýblıkalyq jáne halyqaralyq olımpıada jeńimpazdary.
Jıyn sońy ýnıversıtettiń ónerpaz stýdentteri qoıǵan kontserttik baǵdarlamaǵa ulasty. Merekelik is-shara ýnıversıtettiń 1 kýrs bilimgerlerine arnalǵan lektsııasymen jalǵasty.
