Grant, dıplom, magıstratýra: Oralda jurtty aldaǵan áıeldiń aılasy áshkere boldy
ASTANA. KAZINFORM — Batys Qazaqstan oblysynda bilim berý salasyna qatysty túrli qyzmet kórsetemin degen jeleýmen turǵyndardyń aqshasyn ıemdengen 35 jastaǵy áıelge qatysty qylmystyq is sotqa joldandy.
Qyrkúıek aıynda Batys Qazaqstan oblysynyń polıtsııa departamentine Oral qalasynyń turǵyny aryzdanǵan. Onyń aıtýynsha, bir áıel joǵary oqý ornynda aqyly negizde bilim alyp júrgen ulyn grantqa aýystyryp berýge ýáde etip, 50 myń teńgesin aldap alǵan.
Tekserý barysynda atalǵan áıeldiń osyǵan uqsas jolmen birneshe adamdy aldaǵany belgili boldy.
Tergeý barysynda kúdiktiniń Oral qalasy men oblys aýdandarynyń turǵyndaryna bilim berý salasyna qatysty túrli máselelerdi sheship berýge ýáde etip, olardyń qarajatyn ıemdengeni anyqtaldy. Atap aıtqanda, ol pedagogterdiń sanattyq testileýden ótýine kómektesip, shekti ball jınap beretinin aıtyp, bir turǵynnan 60 myń teńge, ekinshisinen 120 myń teńge alǵan.
Sondaı-aq birneshe adamǵa magıstratýraǵa túsýge jáne joǵary oqý ornynyń dıplomyn alýǵa kómektesetinin aıtyp, aqshalaryn ıemdengen. Kúdikti ýáde etken qyzmetteri úshin turǵyndardan 50 myńnan 500 myń teńgege deıin aldyn ala tólem alǵan.
Alaıda bergen ýádelerin oryndamaǵan. Osydan keıin jábirlenýshiler polıtsııaǵa aryzdanǵan. Jedel-izdestirý is-sharalary barysynda polıtsııa qyzmetkerleri kúdiktiniń jeke basyn anyqtady. Ol Oral qalasynyń 35 jastaǵy turǵyny bolyp shyqty. Atalǵan derekter boıynsha toǵyz epızodtan turatyn qylmystyq is qozǵalyp, tergeý júrgizildi. Qazirgi ýaqytta is sotqa joldandy.
Aıta ketelik Oralda jábirlenýshilerge 158 mln teńge zalal keltirgen alaıaq áıel sottaldy.
