«Grand Slam» týrnırine qatysatyn dzıýdoshylar belgili boldy
ASTANA. QazAqparat - Qazannyń 28-30 aralyǵynda Birikken Arab Ámirlikteriniń astanasy Abý-Dabıde dzıýdodan halyqaralyq «Grand Slam» týrnıri ótedi, dep habarlaıdy QazAqparat.
Osyǵan oraı elimizdiń Dzıýdo federatsııasy Qazaqstan ulttyq qurama komandasynyń jattyqtyrýshylary bekitken atalǵan týrnırde el namysyn qorǵaıtyn sportshylar tizimin jarııalady.
Sonymen 60 kelide jastar arasyndaǵy əlem chempıony Maǵjan Shamshadın beldesedi. Al 66 kelide Qazaqstannyń sport sheberi, «Úlken dýlyǵa» halyqaralyq týrnıriniń kúmis, Álem kýbogynyń qola júldegeri Ashat Telmanov jarys jolyna shyǵady. Dál osy salmaqta 2013 jyldyń eń úzdik dzıýdoshysy atanǵan Azamat Muqanov ta tatamıde baq synaıtyn bolady.
81 keli salmaq sanatynda da jarys jolyna shyǵatyn eki dzıýdoshymyz bar. Onyń biri - Dıdar Hamza. Ol eresekter arasynda Eýropa kýbogynyń jeńimpazy. Eresekter arasynda Azııa chempıonatynyń kúmis júldegeri atanǵan. Bıyl Rıo tórinde ótken Olımpıada oıyndaryna qatysqanymen joly bolmaǵan edi.
81 kelide Qazaqstan chempıonatynyń kúmis júldegeri, sport sheberi Ádilet Mıssın baq synaıdy.
Al 100 kelige deıingi salmaq sanatynda qazaq kúresinen talaı júldeli oryndardy ıelengen Aıbek Serikbaev beldesedi.
Qyzdar arasynda el namysyn jalǵyz sportshy qorǵaıdy. Ol Rıo Olımpıadasynyń qola júldegeri - Otgontsetseg Galbadrah.
