Grand Slam týrnıri: Eldos Smetov júldesiz qaldy
ASTANA. QazAqparat - Búgin Japonııanyń Osaka qalasynda ótip jatqan dzıýdodan jyldyń qorytyndy týrnıri - Grand Slam básekesinde qazaqstandyq olımpıada júldegeri Eldos Smetov júldesiz qaldy, dep habarlaıdy QazAqparat tilshisi.
QR Ulttyq olımpıada komıtetiniń baspasóz qyzmeti málim etkendeı, jarystyń alǵashqy kúninde eki qazaq balýany tatamıge shyǵyp, ekeýi de jubanysh beldesýinde qarsylastaryna jol berdi.
Eldos Smetov jubanysh beldesýinde japondyq Shıshıme Týremen beldesti. 2015 jylǵy álem chempıonatynda Eldosqa ese jibergen jergilikti tatamı sheberi bul joly sol esesin qaıtara bildi. Tartysty ótken kezdesýdiń negizgi ýaqytynda esep teń túsip, «altyn upaı» dep atalatyn qosymsha kezeńde «ıýko» ádisin alǵan tatamı ıesi jeńiske jetti.
Sondaı-aq, 66 kelidegi Erlan Serikjanov ta jubanysh beldesýinde utyldy. Ol óz tobyndaǵy fınaldyq kezdesýde mońǵolııalyq balýanǵa ese jiberdi.
