«Grand Slam» týrnıri: Búgin qazaqstandyq úsh balýan beldesýge shyǵady
NUR-SULTAN. QazAqparat - Búgin Germanııanyń Dıýsseldorf qalasynda dzıýdodan álemdik «Grand Slam» básekesi bastalady, dep habarlaıdy QazAqparat tilshisi.
Erler men áıelder arasynda ótetin álemdik reıtıngtik týrnırge Qazaqstan sapynan 17 tatamı sheberi qatysady.
Búgin, ıaǵnı jarystyń alǵashqy kúni dzıýdoshylar arasynda erlerden 60 jáne 66 keli salmaqtaǵy balýandar ózara myqtyny anyqtasa, áıelderden 48, 52 jáne 57 kelige deıingi salmaqtaǵy balýandar synǵa túsedi.
Qazaqstandyq tatamı sheberlerinen búgin erler arasynda 60 keli salmaqta Dáýren Súıeýkenov pen 66 kelide Erlan Serikjanov el namysyn qorǵamaq. Al áıelderden 52 keli salmaqta Anna Kazıýlına tatamıge shyǵady.
Esterińizge sala keteıik, osyǵan deıin atalǵan «Grand Slam» dodasynda synǵa túsetin qazaqstandyq tatamı sheberleriniń esimderin jarııalaǵan bolatynbyz.
Jarys 23 aqpanda máresine jetedi.
