Grand Slam týrnıri: otandyq dzıýdoshy qola medal enshiledi
ASTANA. KAZINFORM — Dzıýdodan Qazaqstan quramasynyń ókili Ańsarbek Ǵaınýllın Astanada ótip jatqan Grand Slam týrnırinde qola medal jeńip aldy, dep habarlaıdy UOK baspasóz qyzmeti.
Otandasymyz jarystan keıin suhbat berip, bul onyń osyndaı deńgeıde ótken jarystaǵy alǵashqy júldesi ekenin aıtty.
Aıta keteıik, Ańsarbek Ǵaınýllın 73 kelige deıingi salmaqtyń qola júldesi úshin ótken beldesýde Vlad Mıtrýdy (Moldova) jeńdi.
— Búgingi jarystyń atmosferasy erekshe boldy. Qoldaý bildirgen barsha kórermenge jáne bapkerlerime shynaıy alǵysymdy aıtqym keledi. Bul meniń osyndaı deńgeıde ótken jarystaǵy alǵashqy júldem. Ulttyq qurama sapynda júrgenime jeti-segiz jyl boldy. Osy ýaqytqa deıin júlde buıyrmaı júrgen edi. Búgin qola medal jeńip aldym. Mońǵolııalyq sportshymen bolǵan beldesý óte aýyr ótti. Sol kezdesý kóp kúshimdi alyp qoıdy. Biraq, sol-sebepti jartylaı fınalda utylyp qaldym dep syltaý izdegim kelmeıdi. Bar kúshimdi saldym. Qola medal úshin ótken beldesýdegi qarsylasym da osal emes. Boıy jáne aıaq-qoly uzyn bolǵandyqtan, kúres barysynda biraz qolaısyzdyq týdyrdy. Al fızıkalyq jáne tehnıkalyq jaǵynan ózimdi jaqsyraqpyn dep oılaımyn, — dedi sportshy.
Budan buryn qazaqstandyq dzıýdoshy Jalǵas Qaırolla Astanada ótip jatqan Grand Slam týrnırinde altyn medal jeńip alǵanyn jazǵan edik.
