«Grand Astanadaǵy» lıfttiń qulaýy: Jaýapty adamdar jazalanady
ASTANA. QazAqparat - Astana qalasynyń ákimi «Grand Astana» turǵyn úı kesheninde lıfttiń qulaý jaǵdaıyna baılanysty arnaıy komıssııa jumys júrgizip jatqanyn málim etti, dep habarlaıdy «QazAqparat» HAA tilshisi.
«Óńir turǵyndary retinde lıftpen aınalysatyn kompanııany PIK arqyly aýystyryp, nemese lıftti tolyq jóndete alasyzdar. Ákimdik tarapynan da tıisti sharalar jasalýda. Mysaly, ótken jyly 700-den astam lıft tekserilip, zańdy buzǵany úshin 30 PIK tóraǵasy ákimshilik jaýapkershilikke tartyldy», - dedi qala ákimi halyqqa esep berý kezdesýinde.
Sonymen qatar, shahar basshysy «Grand Astana» turǵyn úı keshenindegi jaǵdaıǵa toqtaldy.
«Al «Grand Astana» turǵyn úıinde bolǵan jaǵdaı boıynsha ákimdiktiń tikeleı aralasýymen apattyń sebebin anyqtaý úshin arnaıy komıssııa tekserý júrgizip jatyr. Nátıjesi shyqqannan keıin jaýapty adamdar jazalanady. Osyndaı sharalar basqa da uıymdarǵa da qoldanylatyn bolady. Biz bul máseleni júıeli túrde sheshýdi josparlap otyrmyz», - dedi Áset Isekeshev.
Eske sala ketsek, buǵan deıin qala ákiminiń orynbasary Qosman Aıtmuxametov halyqpen kezdesken kezde «Gran Astana» turǵyn-úı kesheniniń turǵyndary lıfttiń qulaý jaǵdaıyna baılanysty ýájderin bildirgen bolatyn.
