«Grand Astana» turǵyndary: Lıft kádimgideı qulady
ASTANA. QazAqparat - Búgin xalyqqa esep berý kezdesýi kezinde "Grand Astana" turǵyn úı kesheniniń turǵyndary qala ákiminiń orynbasary Qosman Aıtmuxametovke lıfttiń qalaı qulaǵanyn aıtyp berdi, dep xabarlaıdy QazAqparat tilshisi.
"Kúni keshe bizdiń úıimizde lıft qulady. Onyń ishinde meniń kúıeýim jáne taǵy tórt adam boldy. Lıft jetinshi qabattan qulady. Alaıda ony basqasha jetkizip jatyr, lıfttiń tejegishi istep ketti deıdi. Olaı emes, lıft kádimgideı qulady", - deıdi Ekaterına Manataeva. Onyń aıtýynsha, jubaıy segizinshi qabattan lıftke kirgen. Jetinshi qabatta taǵy eki jas jigit mindi. Sol kezde bir nárse úzilgendeı boldy da, lıft tómen qaraı quldılady. "Lıfttiń qatty qulaǵany sonsha, ishinde bolǵan bes adamnyń bári bastaryn tóbege soǵyp aldy. Abyroı bolǵanda, lıft birinshi jáne ekinshi qabattyń arasynda toqtady. Kúıeýim maǵan qońyraý shalyp, PIK dırektorynyń telefon nómirin surady. Oǵan zvondasaq, almaıdy. Adamdar lıftte 50 mınýt otyrdy. Olardy sál joǵary kóterip, ústińgi qabattardan shyǵardy. Sosyn lıft qulamady, ásheıin, qaýipsizdik júıesi iske qosyldy dep jubata bastady. Qalaı qulamady? Beseýi de bastaryn tóbege soqsa, lıft qulamady dep aıtýǵa bola ma?", - dep atap kórsetti E.Manataeva.
Ákim orynbasary Qosman Aıtmuxametov atalǵan máseleni jiti baqylaýda ustap otyrǵanyn jetkizdi. "Iá, biz keshirim suraımyz. Shynymen de, keshe ondaı jaǵdaı boldy. Biraq eshkim jaýapkershilikten qashyp otyrǵan joq. Qazir arnaıy komıssııa quryldy. Bir-eki kúnde "Grand Astananyń" lıftterin tekserip shyǵamyz. Alańdamańyz. Tıisti sharalady qolǵa alatyn bolamyz", - dedi Q.Aıtmuxametov.
