Grammy júldesin tabystaý ýaqyty koronavırýsqa baılanysty aýystyryldy
LOS-ANDJELES. QazAqparat – Grammy júldesin tabystaý saltanaty koronavırýs pandemııasyna baılanysty resmı túrde 2021 jyldyń naýryz aıynyń ortasyna aýystyryldy, dep habarlaıdy QazAqparat CNN-ge silteme jasap.
AQSh-tyń óner jáne dybys jazý tehnıkasy akademııasynyń, CBS jáne shoý prodıýserleriniń birlesken málimdemesinde úzdik mýzykanttardy marapattaý rásimi koronavırýs pandemııasyna baılanysty 2021 jyldyń 14 naýryzynda jeksenbide ótedi dep kórsetilgen.
Atalǵan shara 31 qańtarda Los-Andjelestegi Staples Center-de ótýi tıis bolǵan. Al ony «The Daily Show» júrgizýshisi Trevor Noa júrgizýi kerek edi.
Sharany uıymdastyrýshylardyń málimdemesinde kórsetilgendeı, Los-Andjelestegi COVID-19-ǵa baılanysty jaǵdaıdyń nasharlaýy, onda aýrýhanalar, jansaqtaý bólimsheleri naýqastarǵa tolyp qalýy shoýdy keıinge qaldyrý týraly sheshim qabyldaýǵa májbúr etken. «Bizdiń mýzykalyq qaýymdastyq músheleriniń jáne shoý jasaý úshin tynymsyz jumys isteıtin júzdegen adamnyń densaýlyǵy men qaýipsizdiginen mańyzdy eshteńe joq», - delingen habarlamada.
Málimdemede uıymdastyrýshylar barlyq talantty mýzykanttarǵa, qyzmetkerlerge, ásirese bıylǵy jylǵy nomınanttarǵa olardy túsingeni, shydamdylyǵy jáne erekshe jaǵdaıda jumys istegeni úshin rızashylyǵyn bildirgen.
Ánshi Beıonse, Dýa Lıpa jáne Teılor Svıft, sonymen qatar ánshi Roddı Rıchch bıyl nomınatsııalar sany boıynsha kósh bastap tur. Bıyl Grammy statýetkalary 84 atalym boıynsha tabystalady.
Aıta ketý kerek, 20 jastaǵy qazaqstandyq Imanbek Zeıkenov (Imanbek) Roses SAINt JHN ánimen «Úzdik remıks» atalymynda Grammy-ge úmitkerlerdiń biri atandy. Bul – Imanbek úshin amerıkalyq bedeldi syılyqqa usynylǵan alǵashqy nomınatsııa.
