Graffıtı jazbalar arqyly esirtki jarnamalaýshy kúdiktiler ustaldy – QR ІІM
Baspasóz qyzmetiniń málimetterine qaraǵanda, esirtki qylmysy úshin jaýapkershilikti qatańdatatyn qylmystyq zańnamaǵa engizilgen túzetýler kúshine engennen keıingi alǵashqy aptada esirtkini jarnamalaý men nasıhattaý úshin jaýapkershilik belgileıtin Qylmystyq kodekstiń jańa baby boıynsha eki qylmystyq is qozǵaldy.
15 qańtarda Qaraǵandyda polıtsııa qyzmetkerleri esirtki taratatyn, ınternet-resýrstar kórsetilgen habarlandyrýlar jabystyryp júrgen qalanyń eki turǵynyn ustady.
Ustalǵandardyń ekeýi de narkologııalyq esepte turady, qylmystyq, onyń ishinde esirtki ótkizgeni úshin de jaýapqa tartylǵan.
17 qańtarda Almatyda esirtki prıtonyn tintý barysynda tanymal messendjerdegi topqa ınternet silteme jasalǵan graffıtı-jazbasy úshin qoldanylatyn trafaret alyndy. Prıton qatysýshysy ustalyp, onyń qolynan esirtki taratatyn áleýmettik jelidegi topqa silteme kórsetilgen paraqshalar alyndy.
Daktıloskopııalyq, sot-bıologııalyq jáne narkologııalyq saraptamalar taǵaıyndaldy. Oqıǵa ornynan uıaly telefondar alyndy. Olardaǵy aqparat osyndaı jarnamanyń «tapsyrýshylarymen» ózara baılanystaryn anyqtaýǵa múmkindik beredi.
Іshki ister mınıstrligi 11 qańtardan bastap esirtkini nasıhattaıtyn jáne satatyn ınternet-saıttardyń siltemelerin taratqany úshin qylmystyq jaýapkershilik belgilengenin esterińizge salady. Qylmystyq Kodekske esirtkini nasıhattaý nemese zańsyz jarnamalaý úshin qylmystyq jaýapkershilik belgileıtin jańa 299-1-bap engizildi. Ol boıynsha úsh jylǵa deıin bas bostandyǵynan aıyrý túrindegi jaza kózdelgen.
«Eger osy qylmys toppen, birneshe ret, bilim uıymdarynda nemese adam kóp jınalatyn oryndarda, buqaralyq aqparat quraldary nemese elektrondyq aqparat resýrstaryn paıdalanyp, qyzmetik jaǵdaıyn paıdalanyp jasalsa 3 jyldan 6 jylǵa deıin bas bostandyǵynan aıyrý túrindegi jaza belgilenedi»,-delingen QR ІІM baspasóz qyzmeti taratqan habarlamada.