Graffıtı úshin aıyppul salynbaıtyn oryndar paıda bolady
ASTANA. KAZINFORM — Qazaqstanda graffıtı salýǵa ruqsat etilgen arnaıy alańdar men qabyrǵalar belgilenedi. Bul týraly Premer-mınıstr Oljas Bektenov depýtattyq saýalǵa bergen jaýabynda málimdedi, dep habarlaıdy Kazinform tilshisi.
Úkimet basshysy graffıtı salýǵa qatysty zań talaptary men qoldanystaǵy shekteýlerge toqtaldy.
— Qazirgi ýaqytta jergilikti atqarýshy organdar kóshe ónerin ornalastyrýǵa arnalǵan arnaıy alańdar men qabyrǵalardy belgileý máselesin pysyqtap jatyr, — dedi Oljas Bektenov.
Sonymen qatar ǵımarattarǵa, aıaldamalarǵa, qorshaýlarǵa jáne ózge de mundaı maqsatqa arnalmaǵan nysandarǵa jazý men sýret salý zań buzýshylyq bolyp qala beredi. Bul týraly Premer-mınıstrdiń depýtattyq saýalǵa bergen jaýabynda aıtylǵan.
Oljas Bektenov qoldanystaǵy zańnamaǵa sáıkes, tarıhı-mádenı mura nysandaryn, tarıh jáne mádenıet eskertkishterin, memleket qorǵaýyndaǵy tabıǵı nysandardy jazýlar men sýretter arqyly búldirgeni úshin qylmystyq jaýapkershilik qarastyrylǵanyn eske saldy.
Al ǵımarattardy, ózge de qurylystardy, turǵyn úılerdi, ortaq paıdalanylatyn oryndardy, kóliktegi jáne qoǵamdyq oryndardaǵy múlikti búldirgeni úshin ákimshilik jaýapkershilik kózdelgen.
Jyl basynan beri Qylmystyq kodekstiń 294-baby boıynsha vandalızm faktilerine qatysty 12 sotqa deıingi tergep-tekserý bastalǵan. Sondaı-aq usaq buzaqylyq faktileri boıynsha 59 ákimshilik is qozǵalǵan.
Budan bólek, ákimdikter graffıtıdi anyqtaý jáne nysandardy bastapqy qalpyna keltirý úshin jedel toptar qurǵan.
— Jyl basynan beri Qazaqstanda 20 myńnan astam zańsyz jazý men sýret anyqtaldy. Olarǵa qatysty tıisti sharalar qabyldanyp, jazýlar men sýretter joıyldy, — dep habarlady Oljas Bektenov.
Sonymen birge ýákiletti memlekettik organdar ákimshilik jaýapkershilikti kúsheıtý jáne mundaı áreketterdi zańnamada naqty ajyratý maqsatynda zańnamany jetildirý jumystaryn jalǵastyrady.
Eske salaıyq, buǵan deıin Qazaqstanda qoǵamdyq oryndarǵa zııan keltiretin graffıtı men jazýlar salýǵa tolyq tyıym salý usynylǵan bolatyn.
Jaqynda Qyzylordada esirtkini zańsyz jarnamalaıtyn 38 graffıtı jazýy joıyldy.
