GPS-navıgatsııanyń kómegimen egin sharýashylyǵyn jobalaý eginniń shyǵymyn 30 paıyzǵa arttyrýǵa múmkindik beredi
ASTANA. 22 maýsym. QazAqparat - Bıznes-ınkýbatsııa baǵdarlamasynyń aıasynda egin shyǵymyn 40 paıyzǵa deıin arttyrýǵa múmkindik beretin aqparattyq tehnologııany engizý jobasy iske asyrylýda,
dep habarlady ónertapqysh, Qazaqtyń S.Seıfýllın atyndaǵy agrotehnıkalyq ýnıversıteti tehnıkalyq fakýltetiniń dekany Saıahat Núkeshev pm.kz saıtyna bergen suhbatynda.
Naqty egin sharýashylyǵynyń ereksheligi sol, mıneraldyq tyńaıtqyshtar topyraqqa ońtaıly jáne saralap engiziledi, sonda topyraq mıneraldyq elementterge «tunshyqpaıdy». Ol úshin topyraqtarǵa jasalǵan taldaýdyń negizinde GPS-kartalar jasalady. Topyraqtyń quramy, tyǵyzdyǵy jáne koordınaty týraly málimetter kompıýterge engiziledi de, sonyń negizinde egistik kartasy jasalady. Mıneraldyq tyńaıtqyshtar sol kartanyń negizinde topyraqqa sebiledi.
«Bul jańa tehnologııada topyraqtaǵy árbir qorektendirýshi element eskeriledi. Topyraqqa jasalǵan taldaýdyń negizinde GPS nemese GLONASS júıeleriniń formatynda karta jasalady. Sol elektrondyq karta boıynsha tyńaıtqyshtar topyraqqa engiziledi. Bul tehnologııanyń arqasynda mıneraldyq tyńaıtqyshtardy 30-50 paıyzǵa deıin únemdeý múmkindigi týady»,- deıdi joba avtorlarynyń biri Saıahat Núkeshev.
Ǵalymnyń aıtýynsha, mıneraldyq tyńaıtqyshty únemdeý óz kezeginde topyraqqa túsetin agrohımııalyq «salmaqty» azaıtýǵa sep bolady, sonyń nátıjesinde keleshekte topyraq resýrstary sapalyq jáne tıimdi negizde paıdalanylatyn bolady.
Bul ádistemeni qoldaný úshin S.Seıfýllın atyndaǵy Qazaq agrotehnıkalyq ýnıversıtetiniń tehnıkalyq fakýltetinde mıneraldyq tyńaıtqyshtardy saralap sebýge arnalǵan kýltıvator tehnıkasy jasalyp otyr. Bul tehnıka mıneral sebýmen qosa, egin egý mashınasynyń da qyzmetin atqara alady.
Aıta ketý kerek, TMD keńistiginde ázirge mundaı tehnıka joq. Ýnıversıtet ǵalymdary jasaǵan kýltıvator synaq qorytyndysy boıynsha óziniń tıimdiligin kórsete aldy. GPS júıesimen basqarylatyn ámbebap mashına eginniń shyǵymdylyǵyn 35-40 paıyzǵa arttyrýǵa múmkindik beredi.
Saıahat Núkeshevtiń aıtýynsha, «bul tehnıkany serııalyq óndiriske shyǵarý aýyl sharýashylyǵy salasynyń da, mashına jasaý ındýstrııasynyń da deńgeıin kóterýge múmkindik beretin bolady».
Tehnologııalyq bıznes-ınkýbatsııa baǵdarlamasyn QR Indýstrııa jáne jańa tehnologııalar mınıstrligi 2010 jyly iske asyra bastady. Indýstrııalyq-ınnovatsııalyq qyzmetti memlekettik qoldaý tetikteriniń biri bolyp tabylatyn baǵdarlamanyń operatory - «Tehnologııalyq damý jónindegi ulttyq agenttik» AQ.
2011 jyly baǵdarlamaǵa qatysýǵa 209 ótinish berilip, sonyń ishinde tehnologııalyq bıznes ınkýbatsııa úshin 40 joba irikteldi.
