Gosagro.kz turǵanda Qoldau.kz platformasynda sýbsıdııa rásimdeý tıimsiz – Serik Jumanǵarın

ASTANA. QazAqparat – Senat depýtattarynyń saýalyna jaýap bergen Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın Qoldau.kz platformasyn Gosagro.kz-pen birge sýbsıdııa ótinimderin qabyldaýǵa paıdalaný tıimsiz dep esepteıtinin málim etti, dep habarlaıdy QazAqparat tilshisi.

Buǵan deıin Senat depýtattary Gosagro.kz memlekettik sýbsıdııalaýdyń aqparat júıesinde kemshilikter bar dep esepteıtinderin atap, ondaǵy kemshilikter joıylǵansha ornyna Qoldau.kz platformasyn paıdalana turýdy usynǵan bolatyn.

Serik Jumanǵarın jaýabynda sol usynysqa baılanysty Úkmet ustanymyn bildirgen.

«Aýyl sharýashylyǵy mınıstrligi Gosagro.kz memlekettik sýbsıdııalaýdyń aqparat júıesindegi aýyl sharýashylyǵy taýaryn óndirýshilerden sýbsıdııa ótinimderin qabyldaý kezinde týyndaǵan búkil aqaýlardy tolyǵymen joıdy.

Qazirgi tańda aqparat júıe shtattyq rejımde jumys istep tur. Túsken ótinimder sany –5 500, Olardyń somasy – 17,4 mlrd teńge. Jergilikti atqarýshy organdar sonyń 1,3 mlrd teńgesin maquldady», - dep jazylǵan jaýapta.

Vıtse-premerdiń aıtýynsha, mólsherlemeni sýbsıdııalaýǵa qarjylyq ınstıtýttardan 4 mlrd teńgeniń ótinimi túsken.

«Túrkistan, Qaraǵandy, Atyraý, Jambyl, Soltústik Qazaqstan jáne Aqmola oblystarynda aqpan aıynan bastap aýyl sharýashylyǵy taýarlaryn óndirýshilerge tıisti sýbsıdııalar tólene bastady.

Sonymen birge Gosagro.kz memlekettik sýbsıdııalaýdyń aqparat júıesine kirip, ótinim rásimdeý aýyl sharýashylyǵy taýarlaryn óndirýshilerge de, jergilikti atqarýshy organdarǵa da tegin ekenin atap ótý kerek.

Osy aıtylǵandardy eskersek, «Qoldau.kz» platformasyn sýbsıdııa ótinimderin qabyldaýǵa Gosagro.kz aqparat júıesimen qatar paıdalaný tıimsiz», - dep jazady Serik Jumanǵarın.