Kúıgensaı shatqalynda týrısterge arnalǵan jańa jaıaý júrginshiler kópiri ashylady
ALMATY. KAZINFORM – Týrızm men ekotýrızmdi turaqty damytý baǵdarlamasy aıasynda Kúıgensaı shatqalynda salynyp jatqan zamanaýı «Arman kópir» dep atalatyn jaıaý júrginshiler kópiriniń qurylysy aıaqtalýǵa jaqyn.
Almaty ákimdiginiń málimetinshe, nysan jospar boıynsha bıyl qyrkúıek aıynda paıdalanýǵa beriledi. Uzyndyǵy 77 metr bolatyn kópir shatqaldyń eki jaǵyn qosyp, bolashaqta ashylatyn oqýshylarǵa arnalǵan «Myń bala» sport klýbyna jol ashady.
– Kópirdiń qurylysy jer bederiniń kúrdeliligin eskere otyryp jasalǵan. Onyń beriktigi men senimdiligi joǵary, halyqaralyq qaýipsizdik jáne paıdalaný standarttaryna saı keledi. Joba jekemenshik kompanııa bastamasymen, Eýropanyń taýly jáne qorǵalatyn aımaqtarynda aspaly kópir salýda kópjyldyq tájirıbesi bar Shveıtsarııanyń Swissrope Ltd kompanııasymen birlese júzege asyrylyp otyr, - dep habarlady ákimdikten.
Kópirge jaqyn mańda 912 m² aýmaqty qamtıtyn kópfýnktsıonaldy sport zaly men balalarǵa jáne oqý-jattyǵý jıyndaryna qatysýshylarǵa arnalǵan 12 modýldi kapsýla ashylady. Jańa keshen jyl boıy sporttyq jattyǵýlar ótetin jáne tabıǵat aıasyndaǵy bilim berý baǵdarlamalary júrgiziletin alańǵa aınalady.
Eske salaıyq, buǵan deıin Almatydaǵy «Gorelnık» termaldy bulaǵynyń tazalyǵyna kim jaýapty ekenin jazǵanbyz.
