Gorbachev BUU QK-ni ıadrolyq soǵysty boldyrmaý jónindegi qarar qabyldaýǵa úndedi
ASTANA. QazAqparat - KSRO-nyń burynǵy prezıdenti Mıhaıl Gorbachev «Reseı gazeti» saıtyna shyqqan óz maqalasynda BUU Qaýipsizdik keńesiniń múshelerin memleket basshylary deńgeıinde ıadrolyq soǵysqa jol bermeý jónindegi qarardy qabyldaýǵa úndedi.
Juma kúni KSRO-nyń eks-prezıdentiniń maqalasy Time jýrnalynda da jarııalandy, ol sondaı-aq BUU Qaýipsizdik keńesiniń múshelerin «Memleket basshylar deńgeıinde Qaýipsizdik keńesiniń kezdesýin ótkizip, ıadrolyq soǵysqa jol berilmeıtindigi jáne ol eshqashan bolmaıtyndyǵy týraly jazylǵan qarardy qabyldaýǵa» úndedi, - dep jazady «RIA Novostı» agenttigi.
«Álem men beıbitshilikti ustap turýǵa jaýap beretin eń basty organ BUU Qaýipsizdik keńesiniń múshelerin alǵashqy qadam jasaýǵa shaqyramyn», dep jazdy Gorbachev «Reseı gazeti» saıtynda jarııalanǵan maqalasynda.
Ol osyndaı bastamamen erekshe jaýapkershilik artylyp otyrǵan Reseı men AQSh prezıdentteri shyqsa durys bolar edi degen oıyn bildirdi. Onyń aıtýynsha, álemniń ıadrolyq arsenalynyń 90 paıyzyna osy elder ıe.
