Google jasandy ıntellekt qýaty úshin SpaceX-ke aıyna $920 mln tólemek
ASTANA. KAZINFORM – Google jasandy ıntellekt tehnologııalaryn damytý úshin SpaceX kompanııasynyń esepteý qýatyn paıdalaný jóninde aýqymdy kelisim jasasty, dep habarlaıdy BILD basylymy.
SpaceX kompanııasynyń IPO qujattaryna sáıkes, kelisimshart quny aıyna 920 mıllıon dollardy quraıdy. Kelisim osy jyldyń qazan aıynan bastap kúshine enip, 2029 jyldyń maýsym aıynyń sońyna deıin jalǵasady.
Google zamanaýı neırojelilerdi oqytý men jumysyn qamtamasyz etý úshin qajet arnaıy jasandy ıntellekt chıpteriniń iri klasterine qol jetkizedi.
Osyndaı kelisimdi Claude modelder toptamasyn ázirlegen Anthropic kompanııasy da jasaǵan. Onyń aı saıynǵy tólemi 1,25 mıllıard dollar bolady.
Generatıvti jasandy ıntellektiniń damýyna baılanysty esepteý resýrstaryna suranys qarqyndy ósip keledi. Іri tehnologııalyq kompanııalar derekter ortalyqtaryn salýǵa, chıpter satyp alýǵa jáne ınfraqurylymdy keńeıtýge ondaǵan, tipti júzdegen mıllıard dollar ınvestıtsııalap keledi.
Buǵan deıin Google bıylǵy kapıtaldyq shyǵyndaryn 190 mıllıard dollarǵa deıin jetkizýdi josparlap otyrǵanyn habarlaǵan. Onyń edáýir bóligi jasandy ıntellekti men derekterdi óńdeý ortalyqtaryn damytýǵa baǵyttalady.
Sonymen qatar SpaceX kompanııasy NASDAQ bırjasyna shyǵýǵa daıyndalyp jatyr. Aktsııalardy ornalastyrý 12 maýsymǵa josparlanǵan.
Derekkózderdiń málimetinshe, kompanııa ınvestorlarǵa bir aktsııasy 135 dollardan 555 mıllıon jańa aktsııa usynbaq. IPO-nyń jalpy kólemi 75 mıllıard dollarǵa jetýi múmkin.
Eger bul kórsetkishter rastalsa, ornalastyrý álemdik qor naryǵy tarıhyndaǵy eń iri IPO bolmaq.
Buǵan deıin Anthropic kompanııasy 2027 jylǵa qaraı jasandy ıntellektiniń baqylaýdan shyǵyp ketý qaýpi bar ekenin eskertken.
