Google jańa Gemini 4 Carbon jasandy ıntellekt modelin tanystyrdy
ASTANA. KAZINFORM — Google uzaq ýaqyt boıy ózdiginen jumys isteýge arnalǵan Gemini 4 Carbon jasandy ıntellekt modelin tanystyrdy. Ol aýqymdy baǵdarlamalyq jobalardy taldap, qatelerdi taýyp, túzete alady. Sondaı-aq kıberqaýipsizdik salasyndaǵy kúrdeli mindetterdi sheshýge qabiletti.
Ázirleýshilerdiń aıtýynsha, modeldiń basty erekshelikteriniń biri — birneshe kún boıy úzdiksiz jumys isteı alýy. Gemini 4 Carbon úlken kod bazalaryn zerttep, júıedegi aqaýlardyń sebebin anyqtaıdy, qajetti túzetýler engizedi. Alǵashqy áreketteri sátsiz bolsa, máseleni sheshýdiń basqa joldaryn izdeıdi. Ázirge Google bul múmkindikterdi kompanııa ishindegi synaqtar barysynda baǵalaǵan.
Google málimetinshe, kompanııanyń óz synaqtarynda Gemini 4 Carbon qaýipsiz kod jazý kórsetkishi boıynsha Gemini 4 Argon modelinen eki eseden astam joǵary nátıje kórsetken. Budan bólek, Artificial Analysis Intelligence Index v5.0 reıtınginde 59 ball jınap, birinshi orynǵa shyqqan.
Jańa model kezeń-kezeńimen qoldanysqa engiziledi. Alǵashqy kezeńde Gemini 4 Carbon-ǵa kıberqaýipsizdik salasynda iriktelgen mamandar men Fairwind baǵdarlamasynyń senimdi seriktesteri qol jetkize alady. Keıin Google modeldi ázirleýshilerge, uıymdarǵa jáne qarapaıym paıdalanýshylarǵa usynýdy josparlap otyr.
Kompanııa API arqyly jumys isteý tarıfterin de jarııalady. Bir mıllıon kiris tokeniniń quny — 2 dollar, al bir mıllıon shyǵys tokeni — 10 dollar. Baǵa model óńdeıtin derekter kólemine baılanysty belgilenedi.
Eske salaıyq, Google buǵan deıin Gemini toptamasyndaǵy Gemini 4 Argon modelin tanystyrǵan bolatyn. Ol baǵdarlamalaý, grafıkterdi taldaý, uzaq beınejazbalardan qajetti málimetterdi tabý jáne qujattardaǵy aqparatty óńdeý mindetterine arnalǵan.
