Google zertteý dırektory Pıter Norvıg: Bolashaqta JI medıtsına men bıologııaǵa úlken serpilis ákeledi
ASTANA. KAZINFORM – 30 qyrkúıek kúni Astana Hub tehnoparkinde Firebase Studio Championship baıqaýynyń aqtyq kezeńi ótti. Bul shara Google for Developers jáne Astana Hub seriktestigimen uıymdastyrylyp, onlaın jáne oflaın formatta qatar ótkizildi.
Baıqaý aıasynda Google kompanııasynyń zertteý jónindegi dırektory, álemge tanymal ǵalym Pıter Norvıgpen erkin formattaǵy suhbat uıymdastyryldy. Suhbatty Google for Startups & Developers bóliminiń jetekshisi Ramesh Chander júrgizdi.
Jıyn barysynda jas mamandar men stýdentter jasandy ıntellekt salasynyń ózekti máseleleri men bolashaǵyna qatysty birqatar suraq qoıdy.
Pıter Norvıgtiń aıtýynsha, JI tehnologııalarynyń naqty ómirde qoldaný áleýeti joǵary salalardyń biri medıtsına men bıologııa bolyp tabylady.
– Árıne, bul baǵyttarda eleýli nátıjeler bar, degenmen, áli de zerttelmegen, sheshimin tappaǵan máseleler de jeterlik. Men osy salalarǵa úlken úmit artamyn. Sebebi tereń úıretý ádisteri qazirgi bıologııalyq zertteýlerdiń negizgi quraldarynyń birine aınalyp otyr, – dedi ol.
Qatysýshylardyń biri qazirgi JI úlgileriniń negizin qalaǵan transformer tásiliniń bolashaǵyna qatysty saýal qoıdy. Norvıg bul ádistiń bir jaǵynan kezdeısoq tabysqa jetkenin, biraq onyń astarynda mańyzdy tujyrym jatqanyn atap ótti.
– Transformerdiń sátti bolýy birinshiden, esepteý jabdyqtaryna saı keletindeı etip oılastyrylǵan qurylym bolsa, ekinshiden ótken derekterdiń arasynan mańyzdysyn irikteı bilýdi maqsat etken «nazar aýdarý» tetiginiń arqasy, – dedi ol.
Ǵalymnyń aıtýynsha, bolashaqta jańa tehnıkalyq quraldar paıda bolýyna baılanysty transformerdi almastyratyn jańa júıeler týyndaýy múmkin. Biraq olardyń bári bir qaǵıdatqa súıenedi: burynǵy tájirıbege qarap, qazirgi sheshim qabyldaý.
– Shynyn aıtsam, transformer tásili osynshalyqty uzaq ýaqyt boıy ústem bolady dep kútpegen edim, – dedi Norvıg.
Sondaı-aq ol 2020 jyly shyqqan áıgili oqýlyǵyna transformer týraly bólimdi Google ınjenerleriniń kómegimen jazǵanyn, sol kezde ózge tásilder de usynylǵanyn, biraq oqyrmanǵa túsinikti bolý úshin tek birin ǵana tańdaǵanyn jetkizdi.
Suhbat barysynda qoıylǵan mańyzdy saýaldardyń biri – generatsııa men qııal arasyndaǵy shekara týraly boldy. JI qııaldaı ala ma? Bul múmkin be?
– Biz jasandy júıelerden qazirdiń ózinde shyǵarmashylyqtyń belgilerin kórip otyrmyz. Mysaly, JI-diń qatysýymen jańa matematıkalyq teoremalar dáleldendi, mýzykalyq týyndylar men sýretter jasaldy. Men ózim de keıde modeldi qarap, men budan artyq jasaı almas edim dep oılaımyn, – dedi Norvıg.
Sonymen qatar ol Stenford ýnıversıtetinde júrgizilgen tájirıbeni mysalǵa keltirip, óz oıyn jalǵastyrdy. JI-ge jáne aspıranttarǵa birdeı tapsyrma berilip, táýelsiz sarapshylar olardyń shyǵarmashylyq ıdeıalaryn baǵalaǵan. Nátıjesinde, JI jasaǵan ıdeıalar anaǵurlym kreatıvti dep tanylǵan.
– Adamdar jıi «qııal tek adamǵa tán qasıet» dep oılaıdy. Biraq shyn máninde, qııal burynǵy ıdeıalardy jańa tásilmen biriktirý qabileti. Bul algorıtmder úshin de qoljetimdi múmkindik, – dedi ol.
Jasandy jalpy ıntellekt (AGI) deńgeıine qanshalyqty jaqynbyz jáne ony qalaı basqarý kerek degen taqyrypqa da ǵalym Pıter Norvıg jaýap berdi.
– Men JI-di qural dep sanaımyn. Biz basqa quraldardy qalaı basqaratyn bolsaq, muny da solaı basqarýymyz kerek. Kóp adam eger bir júıe bizden áldeqaıda myqty bolsa, ol bizdiń ómirimizge qaýip tóndiredi dep alańdaıdy. Biraq biz onsyz da sondaı júıelermen ómir súrip jatyrmyz – dedi Norvıg.
Ol keıbir sarapshylar aıtyp júrgen «jedel serpilis» (hard takeoff), ıaǵnı bir uıymnyń kútpegen jerden sýperıntellekt jasap, qalǵandaryn artta qaldyrýy shynaıy stsenarıı emes dep esepteıdi.
– Bul salada bir ǵana qupııa tásil joq. Eger bir komanda tabysqa jetse, kóp uzamaı ózgeleri de sonyń izin basady. Sondyqtan men bul máseleden asa qaýiptenbeımin, – dedi ǵalym.
Sonymen qatar ol eger JI salasynda jaǵymsyz saldarlar oryn alsa, olar adamzat tarıhynda buryn da bolǵan – bankrotqa ushyraǵan korporatsııalar nemese soǵys bastaǵan memleketter arqyly kórinetin máselelermen salystyrýǵa bolatynyn atap ótti.
Eske sala keteıik, Prezıdent elimizge úlken mindet júktep, Qazaqstandy úsh jyldyń ishinde tsıfrlyq derjavaǵa aınaldyrýdy maqsat etip qoıdy. Bul maqsat qanshalyqty júzege asa alady jáne oǵan jetý úshin qandaı naqty qadamdar jasalýy tıis ekenin jazǵanbyz.