Google «Úı tapsyrmasyna kómek» fýnktsııasyn ýaqytsha toqtatty

ASTANA. KAZINFORM — Google kompanııasy «Úı tapsyrmasyna kómek» fýnktsııasyn ýaqytsha óshirdi. Bul sheshim professorlar tarapynan synǵa ushyraǵannan keıin qabyldandy, dep jazdy AZERTADJ. 

Qyrkúıek aıynyń basynda Google Chrome braýzerine jańa batyrma engizdi. Ol bilim berý saıttarynda avtomatty túrde shyǵyp turady. Bul fýnktsııa Google Lens tehnologııasyn paıdalanyp, ekrandaǵy test mazmunyn skanerleıdi jáne jasandy ıntellekt arqyly jaýaptar usynady — tipti emtıhan kezinde de.

Alaıda bul jańalyq birden ýnıversıtetter tarapynan teris reaktsııa týdyrdy. Mysaly, Emorı ýnıversıteti, Alabama ýnıversıteti, Kalıfornııa ýnıversıteti (Los-Andjeles jáne Berklı kampýstary) sekildi joǵary oqý oryndarynyń professorlary bul fýnktsııa stýdentterdiń emtıhandarda ońaı kóshirip alýyna múmkindik beredi dep alańdaýshylyq bildirdi.

— Google akademııalyq adaldyqty buzyp jatyr. Jasandy ıntellektini stýdentterge emtıhan kezinde erkin qoldanýǵa ıtermeleýde. Osy arqyly Google oqytýshylardy AI qoldanýdy baqylaýdan bas tartýǵa májbúr etpek. Chrome braýzeri stýdentterdiń minez-qulqyn ózgerte alatyndaı keń qoldanysqa ıe, jáne Google-dyń maqsaty — dál osy, — deıdi Ulybrıtanııa Tehnologııa ınstıtýtynyń kitaphanashysy Ien Lınkletter.

Google kompanııasynyń ókili Kreıg Ever bylaı dep jaýap berdi:

— Stýdentter bizge vızýaldy túrde úırenýge kómektesetin quraldardy baǵalaıtynyn aıtty. Sondyqtan biz Chrome arqyly Lens-ke jeńil qol jetkizý joldaryn synaqtan ótkizip jatyrmyz. Biz bilim berý salasynyń ókilderimen tyǵyz jumys isteýdi jalǵastyramyz.

Mektepter bul fýnktsııany Google for Education arqyly sóndire alady. Biraq ýnıversıtetterde, stýdentter jıi jeke qurylǵylardy paıdalanatyndyqtan, bul múmkindik onsha tıimdi emes.

Eske sala keteıik, buǵan deıin Google Ulybrıtanııaǵa 5 mlrd fýnt sterlıng ınvestıtsııa salatynyn jazǵan edik.