«Google salyǵy» bıýdjetke 178,8 mlrd teńge ákeldi: eń kóp aqsha tólegen kimder
ASTANA. KAZINFORM – «Google salyǵynan» elimizdiń bıýdjetine túsetin qarjy kóbeıip keledi. 2026 jyldyń basynan beri sheteldik tsıfrlyq servıster men marketpleıster bıýdjetke 51,5 mlrd teńge aýdardy. Kazinform tilshisi eń kóp salyq tólegen kompanııalar tizimin anyqtady.
Agenttik saýalyna bergen jaýabynda Memlekettik kirister komıteti 2022 jyly «Google salyǵy» engizilgen sátten beri sheteldik ınternet-kompanııalar, marketpleıster men áleýmettik jeliler Qazaqstan bıýdjetine 178,8 mlrd teńge aýdarǵanyn (2026 jylǵy 1 tamyzdaǵy málimet boıynsha) málim etti.
«Google salyǵy» — Qazaqstanda ınternet arqyly saýda júrgizetin nemese elektrondyq qyzmet kórsetetin sheteldik kompanııalar tóleıtin QQS (qosylǵan qun salyǵy).
Qazir elimizde osyndaı QQS tóleıtin 133 sheteldik kompanııa tirkelgen. Onyń ishinde Apple, Amazon, Alibaba (1688, Lazada, Tmall ı Taobao, AliExpress), Adobe, Canva, Chess, eBay, Google, GTA, iHerb, Huawei, Meta (Facebook pen Instagram), Microsoft, Netflix, Nintendo, Ozon, OpenAI (ChatGPT), Pinduoduo, Temu, TikTok, Samsung, Sony jáne Zoom bar.
Qandaı servıster eń kóp QQS tóledi?
2025 jyly sheteldik kompanııalar 57,6 mlrd teńge salyq tólepti.
MKK málimetterine súıensek, QQS-tyń edáýir bóligi qazaqstandyqtar arasynda asa tanymal sheteldik marketpleıster men onlaın-servısterdiń úlesine tıip otyr.
Ótken jyly eń kóp salyq tólegen kompanııa - Elementary Innovation Pte. Ltd. Ol qazynany 13,3 mlrd teńgege toltyrǵan. Bul Sıngapýr elinde tirkelgen kompanııa, onyń qyzmeti Temu marketpleısimen baılanysty.
Odan keıingi oryndarǵa 11,2 mlrd teńge salyq tólegen Apple men Steam oıyn platformasyna ıelik etetin Valve kompanııasy jaıǵasqan. Ol bıýdjetti 10,3 mlrd teńgege toltyrypty. Google 7,3 mlrd teńge salyq aýdarsa, iHerb ınternet-dúkeni 4,9 mlrd teńge tólegen eken.
Alǵashqy ondyqqa sondaı-aq Meta, TikTok, AliExpress jáne ózge de sheteldik ınternet-dúkender kirgen.
Netflix, Spotify sııaqty servıster qansha salyq tólegen?
Top-10 iri salyq tóleýshi qataryna birqatar tanymal sheteldik kompanııalar men platformalar enbeı qaldy.
2025 jyly bıýdjetke tómendegideı somada qarjy aýdarǵan:
- Netflix (strımıng servısi) — 353,9 mln teńge;
- Spotify AB (mýzykalyq strımıng servısi) — 293,1 mln teńge;
- Zoom (vıdeobaılanys servısi) — 183,2 mln teńge;
- Nintendo (vıdeo oıyndar shyǵaratyn kompanııa) — 54 mln teńge;
- Coursera (onlaın-oqytý platformasy) — 33,2 mln teńge;
- Samsung Electronics (elektronıka shyǵaratyn kompanııa) — 9 mln teńge;
- IMDb.com (fılmder men serıaldar jaıly onlaın málimetter bazasy) — 375,7 myń teńge.
Atap ótý kerek, Memlekettik kirister komıtetinen alǵan málimetterge sensek, tirkelgen sheteldik kompanııalardyń ishinde QQS tólemegenderi de kezdesedi. Komıtet qyzmetkerleriniń túsindirýinshe, kompanııalar elimizde taýar satqanda nemese qazaqstandyq tutynýshylarǵa qyzmet kórsetkende ǵana salyq tóleıdi. Sondyqtan QQS tólegeni jaıly derek bolmasa, demek osy kezeńde bul kompanııa qazaqstandyqtarǵa eshqandaı qyzmet kórsetpedi nemese eshteńe satpady degen sóz.
Tórt jylda sheteldik ınternet-kompanııalar qansha salyq tóledi?
«Google salyǵynan» túsetin qarjy jyl saıyn ulǵaıyp keledi:
- 2022 jyly — 10,4 mlrd teńge;
- 2023 jyly — 24,3 mlrd teńge;
- 2024 jyly — 35 mlrd teńge;
- 2025 jyly — 57,6 mlrd teńge;
- 2026 jylǵy 1 qańtardan 1 tamyzǵa deıin — 51,5 mlrd teńge.
Eń úlken ósim byltyr bolǵan. Sheteldik kompanııalar ótken jylmen salystyrǵanda 22,6 mlrd teńgege artyq salyq tólegen eken.
Alaıda bıylǵy salyq túsimderi odan da asyp túsýi múmkin. Óıtkeni bıylǵy jeti aıdyń ózinde kompanııalar salyqqa 51,5 mlrd teńge aýdarǵan, bul byltyrǵy jyl boıy tólegen jeteǵabyl kórsetkish.
