Google ótken ýaqytqa saıahat jasaýdy usynady
ASTANA. QazAqparat - Ǵalamtor alpaýyty óziniń tanymal servısine ótken ýaqyt ishinde belgili bir mekenniń qanshalyqty ózgeriske túskenin naqty ýaqytta salystyrýǵa múmkindik beretin qyzmetti qosty, dep habarlaıdy RBK.
Úsh jyl buryn kúshtiligi 9 balldy quraǵan jer silkinisi Japonııa jaǵalaýlarynda asa qýatty tsýnamı týdyrǵan bolatyn. Saldarynan myńdaǵan adam qaza taýyp, kóptegen turǵyn úıler men basqa da ǵımarattar Jer betinen birjola joıylyp ketti. Ókinishke oraı, ol jerdi burynǵy qalpyna keltirý múmkin emes. Osy oqıǵadan keıin Google kompanııasy tsýnamıge deıingi túsirgen Google Street View servısiniń fotosýretterin saqtap qalý týraly sheshim shyǵardy. Endi kompanııa óziniń jelisine Jerdiń barlyq túkpirinen ótken jyldardyń fotosýretterin qosý týraly uıǵarym jasady. Bul óz kezeginde servısti paıdalanýshyǵa belgili bir jer bederiniń burynǵy túri men qazirgi beınesin salystyrý múmkindigin týǵyzyp otyr. Osy qyzmettiń túrin oılap tapqandardyń pikirinshe, bul júıeni qosý týraly álem boıynsha kóptegen adamdar ótinish bildirgen kórinedi. Atap aıtqanda, Google Street View bir jerdi ár jyldary túsirgen erekshe fotoalbom retinde suranysqa ıe bolýda. Óıtkeni, buryndary kartalar jańartylǵan saıyn, eski sýretter qoljetimdi bolmaıtyn.
