Google men Apple patent úshin sotqa júginbeıtin boldy
ASTANA. QazAqparat - Smartfondardyń, planshettik kompıýterlerdiń álemdik naryǵyndaǵy basty básekelester sanalatyn tehnologııalyq alyptar Apple men Google bir-birine qarsy bergen patentterdi buzý týraly shaǵym aryzdaryn qaıtaryp alýǵa ýaǵdalasty.
Sonymen qatar sheteldik BAQ-tyń habarlaýynsha, eki kompanııa ókilderiniń birlesken málimdemesinde olardyń patenttik júıe reformasynda birlesip jumys isteýge nıet tanytyp otyrǵandyǵy aıtylǵan. Degenmen qol jetkizilgen ýaǵdalastyq olardyń bir-biriniń tehnologııalaryn paıdalanýǵa múmkindik bermeıdi.
Aıta keteıik, Apple men Android operatsııalyq júıesi bazasynda telefondar shyǵaratyn Google búkil álem boıynsha bir-biriniń patentterin buzdy degen aıyppen sotqa ondaǵan shaǵym bergen bolatyn.
Al osydan 1 aı buryn Kalıfornııanyń alqa bıler soty Samsung kompanııasyna Apple-diń smartfondar óndirisinde paıdalanatyn tehnologııalaryna arnalǵan 2 patentin buzǵany úshin 119,6 mln. dollar óteý týraly sheshim shyǵarǵan edi.
