Google korporatsııasy ataýyn ózgertedi
ASTANA. QazAqparat - Amerıkanyń ǵalamtor alyby Google uıymdastyrýshylyq qurylymyn aýystyryp jatyr: Alphabet Inc. («Alfavıt») jańa holdıng kompanııasy qurylyp, Google onyń júzpaıyzdyq enshiles uıymy bolady, dep habarlaıdy RBK.
«Biz bastapqyda aqylǵa syımaıtyn kóptegen is jasadyq. Bizdiń kompanııamyz búginde de jaqsy jumys atqaryp jatyr, biraq biz ony odan da táýir ári esepti ete alamyz dep oılap otyrmyz», - dedi kompanııanyń blogynda Google-diń negizin qalaýshylar Sergeı Brın men Larrı Peıdj jańa tosynsyı týraly sózderinde. Jańalyq aıtylǵan soń, Google-diń aktsııalary 5 paıyzǵa ósken (kapıtaldandyrý - shamamen 450 mlrd. dollar).
Peıdj Google-dyń atqarýshy dırektory qyzmetinen ketip, Alphabet-ti basqarady, al Brın osy kompanııanyń prezıdenti bolady. Google-diń jańa basshysy bolyp buǵan deıin Chrome braýzeri nemese Android operatsııalyq júıesi sııaqty ónimder úshin jaýapty bolǵan aǵa vıtse-prezıdent Sýndar Pıchaı taǵaıyndaldy. Osylaısha, Peıdj ben Brın Google-di kúndelikti basqarýyn qaldyryp, bıznes toptaryn odan da irgeli ári strategııalyq túrde basqarady.
Google iri segment bolady (izdeý qyzmetinen basqa bul jarnama, kartalar, qosymshalar, YouTube jáne Android). Calico (qartaıý jáne uzaq jasaý salasyndaǵy zertteýler), Nest (ózin-ózi oqytý termostattary), Fiber (ǵalamtorǵa joǵary jyldamdyqpen qoljetimdilik), Google Ventures jáne Google Capital ınvestıtsııalyq bólimsheleri sııaqty bir-birimen baılanysy az bıznester negizgi bıznesten táýelsiz túrde basqarylady.
Alphabet saıty kompanııanyń ataýyn kórsetip, abc.xyz mekenjaıymen jumys isteı bastady. «Bizge osy ataý unady, sebebi ol adamzattyń mańyzdy ınnovatsııalarynyń biri - tildiń bir bóligi bolyp tabylatyn áripter jıyntyǵyn bildiredi, bul Google izdeý qyzmetiniń ındeksteý negizine salynǵan», - dep túsindirdi kompanııanyń negizin qalaýshylar.
