Google kıberqaýipsizdik múmkindikteri keńeıtilgen Gemini 4 Argon modelin tanystyrdy
ASTANA. KAZINFORM — Google baǵdarlamalaý, kúrdeli kásibı mindetter jáne kıberqaýipsizdikke baǵyttalǵan jasandy ıntellekttiń jańa modeli — Gemini 4 Argon-dy tanystyrdy. Alǵashqy kezeńde oǵan tek kıberqaýipsizdik salasyndaǵy tekserilgen mamandar qol jetkize alady, dep habarlaıdy CNBC.
Google kompanııasy Argon modelin Gemini jelisindegi eń ozyq model retinde tanystyryp otyr. Kompanııanyń málimetinshe, ol baǵdarlamalyq jasaqtama ázirleý, qarjylyq jáne quqyqtyq taldaý, sondaı-aq kompıýterlik júıelerdi qorǵaýǵa qatysty tapsyrmalardy oryndaýda joǵary nátıje kórsetedi.
Jańa modeldiń negizgi baǵyttarynyń biri — kıberqaýipsizdik. Gemini 4 Argon baǵdarlamalyq jasaqtamadaǵy osal tustardy ózdiginen anyqtap, tekserip jáne joıa alady. Google modeldi Fairwind baǵdarlamasy arqyly kıberqaýipsizdik salasyndaǵy jekelegen mamandarǵa usynyp úlgerdi.
Kompanııanyń habarlaýynsha, Argon qazirdiń ózinde Google ishinde qoldanylyp jatyr. Atap aıtqanda, model derekterdi óńdeý ortalyqtaryndaǵy jadty paıdalaný tıimdiligin arttyrýǵa kómektesip, ońtaılandyrý jumystary nátıjesinde 300 TB-dan astam jadty bosatqan. Google zertteýshileri ony kvanttyq esepteýler salasyndaǵy algorıtmderdi ońtaılandyrý úshin de paıdalanyp jatyr.
Ázirleýshiler modeldi teris maqsatta paıdalanýdan, nusqaýlardy aýystyrý arqyly jasalatyn shabýyldardan jáne basqa da qaýipterden qorǵaýdy kúsheıtip jatyr. Google ókilderiniń aıtýynsha, model kópshilikke qoljetimdi bolǵanǵa deıin qaýipsizdik júıeleri synaqtan ótkizilip, qorǵanys tetikteri jetildirile beredi.
Google málimetinshe, Gemini 4 Argon-nyń kontekstik terezesi 1 mln tokenge deıin jetedi. Bul modelge kólemdi ári kúrdeli tapsyrmalarmen jumys isteýge múmkindik beredi. Kompanııa modelge qoljetimdilikti aldymen aqyly API paıdalanýshylary men Google AI Ultra jazylýshylary úshin keńeıtýdi josparlap otyr.
Gemini 4 Argon tusaýkeseri Gemini 3 modeliniń tanystyrylymynan shamamen bir jyl ótken soń ótti. Jańa model OpenAI jáne Anthropic kompanııalarymen básekelestik jaǵdaıynda Google-dyń jasandy ıntellekt júıelerin damytýynyń kezekti kezeńine aınaldy.
Aıta keteıik, OpenAI kıberqaýipsizdik máselesi úshin AI modelderin oqytýdy ýaqytsha toqtatty.
