Google Qazaqstandaǵy JI damýyndaǵy jetistikterdi joǵary baǵalady

ASTANA. KAZINFORM — Memleket basshysy Google kompanııasynyń Ortalyq jáne Shyǵys Eýropa boıynsha vıtse-prezıdenti Patrık Vornkıngti qabyldady, dep habarlaıdy Aqordanyń baspasóz qyzmeti.

Astana halyqaralyq forýmy aıasynda Prezıdent Qasym-Jomart Toqaev Google kompanııasynyń Ortalyq jáne Shyǵys Eýropa boıynsha vıtse-prezıdenti Patrık Vornkıngpen kezdesti.

Prezıdent kompanııanyń elimizdegi tsıfrlyq transformatsııaǵa eleýli úles qosqanyn atap ótti.

Memleket basshysy Qazaqstannyń Eýrazııadaǵy tsıfrlyq habqa aınalý jóninde strategııalyq maqsat qoıǵanyn jetkizdi. Atalǵan strategııa tirshiliktiń barlyq salasyna jasandy ıntellektini engizýdi kózdeıdi. Ol úshin elimiz tsıfrlyq jáne kommýnıkatsııalyq ınfraqurylymǵa, sondaı-aq esepteý qýatyn arttyrýǵa belsendi túrde ınvestıtsııa quıyp jatyr.

Patrık Vornkıng jasandy ıntellektini paıdalanyp, tsıfrlyq keleshekke jol ashý úshin ınfraqurylym ázirleý jáne maman daıarlaý isinde Qazaqstannyń qol jetkizgen tabysyna joǵary baǵa berdi.

Budan buryn Prezıdent Toqaev pen Pan Gı Mýn turaqty damý máselelerin talqylaǵanyn jazdyq.