Google qaýipti aýrýlarǵa qarsy mıllıondaǵan masa shyǵarady
ASTANA. KAZINFORM — Google Kalıfornııa men Florıdada 64 mıllıonǵa jýyq masa shyǵarýǵa ruqsat surady. Kompanııa qaýipti aýrýlardy taratatyn jándikterdiń sanyn arnaıy ósirilgen bedeý atalyq masalar arqyly azaıtýdy kózdep otyr, dep habarlaıdy Euronews.
Masalar jer betindegi eń qaýipti jándikterdiń biri. Ártúrli baǵalaýlarǵa sáıkes, olar jyl saıyn bezgek, denge bezgegi, sary bezgek, Zıka vırýsy jáne basqa da aýrýlardy taratý arqyly 700 myńnan 1 mıllıonǵa deıin adamnyń ólimine sebep bolady.
Osy qaýippen kúresý úshin Google «Debug» jobasyn damytyp jatyr. Jobanyń maqsaty — tabıǵatqa arnaıy daıyndalǵan atalyq masalardy jiberý.
Kompanııa AQSh bıliginen Kalıfornııa men Florıda shtattarynda eki jyl ishinde 64 mıllıonǵa deıin masa jiberýge ruqsat surady.
Joba saıtynda ǵalymdar «zııandy» masalardyń sanyn «paıdaly» masalar esebinen azaıtýdy kózdeıtini aıtylǵan. Munda arnaıy Wolbachia bakterııasyn juqtyrǵan atalyq masalar týraly aıtalyda. Bul bakterııa olardyń jabaıy analyqtarmen shaǵylysqan kezde ómirsheń urpaq bere almaýyna ákeledi. Analyq masa jumyrtqa salǵanymen, dernásilder damymaıdy, nátıjesinde popýlıatsııa birtindep azaıady.
Mamandar tek analyq masalar adamdardy shaǵatynyn eske salady, sebebi olar jumyrtqany damytý úshin qanmen qorektenedi.
Google bul tehnologııa genetıkalyq modıfıkatsııaǵa jatpaıtynyn jáne hımııalyq ınsektıtsıdter qoldanylmaıtynyn atap ótti. Sondyqtan bul ádis qorshaǵan orta úshin qaýipsizdeý.
Kompanııa sondaı-aq bul masalardy josparlaý men baqylaýǵa arnalǵan baǵdarlamalyq júıelerdi damytyp jatyr. Bul qansha masa qajet ekenin jáne olardy qaı aımaqtarǵa jiberý tıimdi ekenin anyqtaýǵa kómektesedi.
Uqsas baǵdarlamalar buryn da birneshe elde qoldanylǵan. Mysaly, Kıprde 2023 jyly aptasyna 100 myńnan sterıldi masa qorshaǵan ortaǵa jiberilip otyrǵan. Osyndaı jobalar Kýba men Qytaıda da júrgizilgen. Keı jaǵdaılarda masalardy zalalalsyzdandyrý úshin sáýlelendirý ádisi qoldanylǵan.
Aıta keteıik, elordada masa, shybyn-shirkeı jáne ózge de jándikterge qarsy aýqymdy dezınsektsııalyq jumystardyń birinshi kezeńinde 8600 gektar sý aıdyny óńdeldi.
