Google Izraılmen kelisimge narazylyq bildirgen 28 qyzmetkerin jumystan shyǵardy
LONDON. KAZINFORM - Google osy aptada kompanııanyń Izraıl úkimetimen aradaǵy kelisimshartqa narazylyq bildirgen jıyrmadan astam qyzmetkerin jumystan shyǵardy, dep habarlaıdy CNN.
Jumysshylar Nıý-Iork pen Sannıveıldegi (Kalıfornııa shtaty) Google keńselerinde narazylyq aktsııasyn ótkizgeni anyqtalǵannan keıin jumystan shyǵaryldy. Narazylyq bildirýshiler «paıda úshin genotsıdke jol joq» jáne «Biz palestınalyq, arab jáne musylman gýglshilerin qoldaımyz» degen jazýlar ustaǵan.
«Narazylyq bildirgen azdaǵan qyzmetker bizdiń birneshe nysanǵa kirip, kompanııaǵa tıesili múlikterdi qıratty. Basqa qyzmetkerlerdiń jumysyna fızıkalyq túrde kedergi jasaǵan. Olardyń áreketteri bizdiń saıasatymyzdy aıqyn buzý jáne múldem qolaısyz minez-qulyq bolyp tabylady», – deıdi Google ókili.
«Qazir biz 28 qyzmetkerdi jumystan shyǵarýǵa ákelgen jeke tergeýlerdi aıaqtadyq jáne tergeýdi jáne qajet bolǵan jaǵdaıda shara qoldanýdy jalǵastyramyz», – dep qosty ol.
Google kompanııasynyń No Tech for Apartheid dep atalatyn bólimi qyzmetkerleri 2021 jyldan beri qoldanbanyń Izraılge tehnologııa satý týraly kelisimine narazylyq bildirip hat jazyp keledi. Atap aıtqanda, Google Izraıl men Amazon birlesip jasaǵan Nimbus (red. bultty ınfraqurylym, memlekettik sektor men áskerı derekterdi bultqa kóshirýge baǵyttalǵan kóp jyldyq joba) baǵdarlamasyna baılanysty shıelenis artty.
«Bul – óreskel áreket Google-diń genotsıdtik Izraıl úkimetimen jáne áskerılerimen jasaǵan 1,2 mıllıard dollarlyq kelisimin óz qyzmetkerlerinen de joǵary baǵalaıtynynyń aıqyn belgisi», - delingen toptyń beısenbi kúni Medium saıtynda jarııalanǵan málimdemesinde.
Google Cloud jáne Izraıl
Google Cloud kompanııasynyń Izraıl úkimetimen kelisim-sharty 2021 jyldan bastalady. Ol kompanııa «eldiń qoǵamdyq sektoryndaǵy problemalardy, sonyń ishinde densaýlyq saqtaý, kólik jáne bilim berýdi sheshýge kómektesetin qoǵamdyq bulttyq qyzmetterdi» usyný úshin tańdalǵanyn jarııalady.
Biraq narazylyq osy aıdyń basynda Time jýrnalynda Izraıl Qorǵanys mınıstrligi Google Cloud tutynýshysy bolǵany týraly kompanııanyń ishki qujatyna silteme jasaǵan habardan keıin bastalǵan.
