Google ym tilin mátinge aýdaratyn jasandy ıntellektini tanystyrdy
ASTANA. KAZINFORM – Google DeepMind ym tilin naqty ýaqyt rejıminde mátinge aınaldyratyn SL2T (sign-language-to-text) jasandy ıntellekt modelin tanystyrdy. Bul týraly kompanııanyń blogynda habarlandy.
Tehnologııa Pixel 11 smartfondaryndaǵy Gboard jáne Live Transcribe servısterine biriktirilgen.
Buǵan deıin jasandy ıntellekt tehnologııalary negizinen aýyzsha sóıleýdi tanýǵa baǵyttalyp keldi. Al álem boıynsha 70 mln-ǵa jýyq sańyraý jáne nashar estıtin adam qoldanatyn 200-den astam ym tili mundaı tehnologııalarmen aıtarlyqtaı az qamtylǵan.
SL2T kómegimen paıdalanýshylar ym arqyly mátin «terip», ınternetten aqparat izdeı alady, habarlamalar men qujattar jazady, sondaı-aq Gemini jasandy ıntellekt assıstentine suraý jibere alady. Live Transcribe servısinde áńgimelesýshige mátin terýdiń ornyna ymmen jaýap berý múmkindigi qarastyrylǵan.
Ázirge tehnologııa tek amerıkalyq ym tilin (ASL) qoldap, ony aǵylshyn tiline aýdarady. Google aldaǵy ýaqytta tilder men qurylǵylar tizimin birtindep keńeıtýdi josparlap otyr.
Ym tilderiniń ózindik grammatıkasy bar jáne olarda qol qımyldarymen qatar bet álpeti, bas pen deneniń qozǵalysy da mańyzdy ról atqarady. Sondyqtan olardy avtomatty túrde aýdarý jekelegen ymdardy tanýdan áldeqaıda kúrdeli.
SL2T modeli 50-den astam ym tilin qamtıtyn 100 myń saǵattan astam beınederek negizinde oqytylǵan. Júıe jumys kezinde beıneniń ózin emes, adam denesindegi negizgi núktelerdiń koordınattaryn taldaıdy. Sonyń arqasynda serverge bastapqy beınejazba emes, tek qozǵalys týraly derekter jiberiledi.
Model qımyldar tizbegin aralyq ym belgilerin, ıaǵnı glossalardy qoldanbaı-aq tikeleı mátinge aınaldyrady. Ázirleýshilerdiń málimetinshe, FLEURS-ASL testinde júıe BLEURT shkalasy boıynsha 70 ball jınaǵan.
Degenmen tehnologııanyń ázirge birqatar shekteýi bar. Júıe sırek kezdesetin ymdardy, jyldam oryndalatyn saýsaq álipbıin jáne keıbir kúrdeli qurylymdardy taný kezinde qatelesýi múmkin. Sondaı-aq qosymsha kontekst bolmasa, is-árekettiń qaı ýaqytta bolǵanyn anyqtaýda qıyndyq týyndaıdy.
Jobany ázirleýge sańyraýlar qaýymdastyǵynyń ókilderi de qatysqan. Joba ıdeıasynyń avtory – Google qyzmetkeri Sem Sepa, onyń ózi de sańyraý. Qaýymdastyq ókilderi derekter jınaýǵa jáne modeldi synaqtan ótkizýge atsalysty.
Eske sala ketsek, buǵan deıin Google rezervtik kóshirmelerdi saqtaý erejesin ózgertetinin jazdyq.
