Google Earth Jerdiń ústimen ushýǵa arnalǵan tegin avıasımýlıatordy iske qosty
ASTANA. KAZINFORM — Google Earth qoldanýshylary braýzerdiń ishinde tikeleı vırtýaldy ushaqty basqarý múmkindigine ıe boldy. Jańa avıasımýlıator Jerdi qus ushatyn bıiktikten zertteýge múmkindik beredi. Endi paıdalanýshylar álemniń ártúrli bólikterindegi 3D qalalar men tabıǵı landshaftardy baqylaı alady, dep habarlaıdy Euronews.
12 maýsymda iske qosylǵan qural negizinen avıatsııa men saıahat áýesqoılaryna arnalǵan. Ushý úshin qosymsha baǵdarlamalardy ornatý qajet emes — tek braýzerde Google Earth ashyp, Flight Simulator rejımin qosý jetkilikti.
Vırtýaldy saıahat kezinde paıdalanýshylar planetanyń túrli aımaǵynan ushyp, joǵary deńgeıde egjeı-tegjeıli jasalǵan 3D ǵımarattardy, kórikti jerlerdi jáne jer bederiniń panoramalaryn tamashalaıdy.
Buǵan deıin avıasımýlıator tek Google Earth-tiń kásibı jumys ústeli nusqasynda ǵana bolǵan. Endi bul fýnktsııa alǵash ret veb-nusqaǵa biriktirilip, ony keń aýdıtorııaǵa qoljetimdi etti.
Sımýlıatordy iske qosý úshin Google Earth ashyp, Explore Earth bólimin tańdap, keıin Tools mázirine kirip, Flight Simulator batyrmasyn basý qajet.
Ázirleýshiler ushaqty basqarýǵa arnalǵan jyldam perneler tizimin de jarııalady. Paıdalanýshylarǵa jyldamdyqty arttyrý, tejeý, baǵytyn ózgertý, bıiktikke kóterilý jáne manevr jasaý komandalary qoljetimdi.
Oıyn-saýyq sıpatynda bolǵanymen, basqarýdy meńgerý ońaı emes. Eger vırtýaldy ushaq jerge soǵylsa, sımýlıator ushýdy avtomatty túrde toqtatyp, marshrýtty qaıta bastaýǵa múmkindik beredi.
Aıta keteıik, Qazaqstanda avıatsııalyq jumystar tek sertıfıkatpen júrgizilýi tıis.
