Google-diń burynǵy ınjenerine Qytaı tyńshysy degen aıyp taǵyldy

ASTANA. KAZINFORM – Google kompanııasynyń burynǵy ınjeneri tyńshylyq jasady degen kúdikke ilindi. Oǵan Google-den jasandy ıntellekt (JI) tehnologııasyn urlap, Qytaıdyń JI ındýstrııasyn damytýǵa kómektesti degen aıyp taǵylyp otyr. Bul týraly sıngapýrlyq Lianhe Zaobao basylymy jazdy.

Google компаниясының бұрынғы инженері тыңшылық жасады деген күдікке ілінді
Фото: freepik.com

Basylymnyń habarlaýynsha, AQSh Ádilet mınıstrligi 4 aqpan kúni Google kompanııasynyń burynǵy baǵdarlamashy-ınjeneri Dın Lınveıge jańa aıyptar taǵylǵanyn málimdedi. Buǵan deıin oǵan kommertsııalyq qupııalardy urlaý baby boıynsha tórt aıyp taǵylǵan bolatyn. Endi oǵan ekonomıkalyq tyńshylyq jasaý baby boıynsha jeti aıyp jáne kommertsııalyq qupııalardy urlaý baby boıynsha jeti aıyp qosylyp otyr.

AQSh Ádilet mınıstrliginiń dereginshe, eger qylmysy dáleldense, kommertsııalyq qupııany urlaý boıynsha taǵylǵan árbir aıyp úshin ol 10 jylǵa deıin bas bostandyǵynan aıyrylyp, 250 myń AQSh dollaryna deıin aıyppul tóleıdi. Al ekonomıkalyq tyńshylyq boıynsha taǵylǵan árbir aıyp úshin oǵan 15 jylǵa deıin túrme jazasy taǵaıyndalyp, 5 mıllıon dollardan kem emes aıyppul salynady.

Aıyptaý aktisinen belgili bolǵandaı, Google 2019 jyly Dın Lınveıdi baǵdarlamashy-ınjener retinde jumysqa alǵan. 2022 jyldyń mamyrynan 2023 jyldyń mamyryna deıin, ol óziniń Google Cloud akkaýntyna 1000-nan astam faıl júktegen. Faıldardyń arasynda Google-diń qupııa kommertsııalyq derekteri de bolǵan.

Aıyptaý qorytyndysyna sáıkes, Dın Lınveı Google-diń kommertsııalyq qupııalaryn Qytaı úkimetiniń paıdasyna asyrmaq nıetpen urlaǵan. Ol Google-diń sýperkompıýterlik derek ortalyqtaryn Qytaıǵa JI modelderin jetkizý úshin paıdalanýǵa múmkindik beretin apparattyq jáne baǵdarlamalyq tehnologııalardy urlady degen kúdikke ilinip otyr.

Belgili bolǵandaı, Dın Lınveı Google-de jumys istep júrgende Qytaıdyń eki kompanııasymen jeń ushynan jalǵasqan jáne 2022 jyldyń maýsymynda Beıjińge ornalasqan startap kompanııanyń bas tehnıkalyq dırektory qyzmetin qosa atqarǵan. 2023 jyldyń mamyr aıynda ol Shanhaıda óziniń JI jáne mashınalyq oqytýǵa mamandanǵan tehnologııalyq kompanııasyn qurady.

Sondaı-aq aıyptaý qorytyndysynda Dın Lınveıdiń Qytaı bıliginiń kadrlyq qoldaý baǵdarlamasyna ótinim bergeni de aıtylǵan. Baǵdarlama shetelde ǵylymı-zertteý jumystarymen aınalysqan jáne ózi ıgergen bilim men zertteý jetistigin Qytaıǵa ala qaıtqan ǵalymdarǵa qarjylyq qoldaý kórsetýge baǵyttalǵan.

Iranda WhatsApp pen Google Play jumys isteı bastaǵanyn jazǵan bolatynbyz.

Сейчас читают