Google dıabet aýrýyna shaldyqqandarǵa arnalǵan kórý lınzasyn tanystyrdy
ASTANA. 18 qańtar. QazAqparat - Google kompanııasy organızmdegi qant kólemin qadaǵalap otyrýǵa múmkindik beretin kórý lınzalaryn tanystyrdy, dep jazdy The Telegraph.
Bul qant dıabetimen aýyratyn adamdar úshin óte mańyzdy, búginde álem boıynsha 382 mln. adam atalmysh dertke shaldyqqan. Lınza qabattarynyń ortasynda ınsýlın ınektsııasynyń qajettiligi týraly aqparat beretin glıýkoza sensory men symsyz habar taratqysh quraly bar. Kompanııa ókilderiniń aıtýynsha, bul quraldy jasaýǵa bes jyldaı ýaqyt ketedi.
«Biz kishkentaı ǵana symsyz chıp pen kishigirim glıýkoza taratqysh quralyn paıdalana otyryp, glıýkozanyń kólemin ólsheıtin «aqyldy» kórý lınzalaryn synaqtan ótkizdik. Budan bólek, lınzalar adamnyń shashynan da juqa bolyp keletin antennamen jabdyqtalǵan», dedi jobanyń jetekshisi Braıan Otıs.
Qurylǵy glıýkozanyń kórsetkishin sekýnd saıyn eseptep turady. Kózdiń qarashyǵyna tımegendikten, lınzaǵa ornatylǵan chıp pen taratqysh quraly kózdiń kórýine áserin tıgizbeıdi.
Endi Google kompanııasy atalǵan ónimdi birigip shyǵarý úshin ózine seriktes izdep jatyr. Buǵan qosa, kompanııa ókilderi jobaǵa qatysýshylar men oǵan quıylatyn qarjy týraly aqparatty ázirge bermeı otyr.
