Google-dy aıyptaǵan násildik kemsitýshilik isi 50 mln dollarmen jabyldy
ASTANA. KAZINFORM – Google kompanııasy jumysqa qabyldaý, jalaqy tóleý jáne mansaptyq ósýde júıeli násildik kemsitýshilik jasady dep aıyptaǵan qara násildi qyzmetkerlerdiń ujymdyq talabyn 50 mln dollar kólemindegi kelisim arqyly rettedi, dep habarlaıdy Associated Press agenttigi.
Talap-aryzdy 2022 jyly Google-dyń burynǵy qyzmetkeri Eıprıl Kerlı bergen. Ol kompanııany qara násildi qyzmetkerlerge ádiletsiz qaraýdyń «júıeli tájirıbesin» qalyptastyrdy dep aıyptady.
Onyń aıtýynsha, kompanııa qara násildi qyzmetkerlerdi ádeıi jalaqysy tómen ári deńgeıi tómen qyzmetterge ornalastyrǵan. Al óz pikirin ashyq aıtqandar qysymǵa ushyraǵan. Keıin bul iske basqa da burynǵy qyzmetkerler qosylyp, is ujymdyq talap mártebesin aldy.
– Bul is jaýapkershilikke tartý týraly boldy. Tehnologııa salasyndaǵy qara násildi mamandardyń múmkindigin shekteıtin kedergiler tym uzaq ýaqyt boıy saqtalyp keldi, – dedi talapkerlerdiń advokaty Ben Kramp.
Kelisim 2025 jylǵy mamyrda jarııalanyp, osy aptada túpkilikti maquldandy. Google qyzmetkerlerge durys qaramady degen aıyptardy úzildi-kesildi joqqa shyǵaryp, teń jalaqy men ádil jumysqa qabyldaý qaǵıdattaryna adaldyǵyn saqtaıtynyn málimdedi.
Bul is kompanııadaǵy qara násildi qyzmetkerlerdiń kópjyldyq shaǵymdarynyń jalǵasyna aınaldy. Olardyń arasynda jasandy ıntellekt salasynyń belgili zertteýshisi Tımnıt Gebrý de bar. Ol 2020 jyly jasandy ıntellekt qaýipteri týraly ǵylymı maqalaǵa qatysty janjaldan keıin Google-dan ketýge májbúr bolǵanyn aıtqan.
Talap-aryzda Google qara násildi úmitkerlerdi «zııandy násildik stereotıpter turǵysynan baǵalady» dep kórsetilgen. Sonymen qatar jumysqa qabyldaý menedjerleri olardy «jetkilikti dárejede Googly emes» dep sanaǵany aıtyldy. Talapkerler bul tirkesti kemsitýshiliktiń jasyryn túri ári násildik astarly kod retinde baǵalaǵan.
Talapkerlerdiń aıtýynsha, suhbat júrgizýshiler qara násildi kandıdattardy ádeıi qolaısyz jaǵdaıǵa qoıyp, mansaptyq ósý múmkindigi tómen qyzmetterge qabyldaǵan.
Bitimgershilik kelisimi kináni moıyndaýdy bildirmeıdi. Ótemaqy tóleýden bólek, Google jalaqy teńdigin turaqty túrde taldap otyrýǵa, eńbekaqy júıesiniń ashyqtyǵyn arttyrýǵa jáne kem degende 2026 jylǵy tamyzǵa deıin eńbek daýlary boıynsha mindetti arbıtrajdy shekteýge mindettendi.
Eske sala ketsek, buǵan deıin tot sheshimimen Google men Meta áleýmettik jelidegi táýeldilik úshin $ 6 mln tóleýge mindettelgen.
