Google Avstralııanyń monopolııaǵa qarsy zańyn buzǵany úshin 30 mıllıon eýro aıyppul tóleıdi

ASTANA. KAZINFORM — Google eki iri baılanys operatory — Telstra jáne Optus kompanııalarymen smartfondarda tek óziniń izdeý júıesin ornatýǵa qatysty zańsyz kelisimder jasaǵany úshin 55 mıllıon avstralııalyq dollar (30 mıllıon eýro) kóleminde aıyppul tóleýge kelisti, dep jazdy Euronews.

Bul kelisimderge sáıkes, atalǵan baılanys operatorlary óz qurylǵylaryna tek Google izdeý júıesin ornatyp, basqa izdeý júıelerin ornatýǵa tyıym salǵan. Onyń ornyna operatorlar Google-diń jarnamalyq kirisinen úles alyp otyrǵan.

Alaıda, Avstralııa zańnamasy mundaı tájirıbeni tikeleı tyıym salady. Eldiń Básekelestikti qorǵaý jáne tutynýshylardyń quqyqtaryn qorǵaý komıssııasy (ACCC) óz málimdemesinde bylaı dep atap ótti:

— Básekelestikti shekteý ádette tutynýshylar úshin tańdaýdyń azaıýyna, baǵanyń ósýine jáne qyzmet kórsetý sapasynyń nasharlaýyna ákeledi, — delingen habarlamada.

Google bul ýájdermen kelise otyryp, aıyppul tóleýge jáne Android smartfondarynyń óndirýshileri men baılanys operatorlarymen jasasqan kelisimsharttarynan izdeý júıelerin aldyn ala ornatýǵa qatysty keıbir shekteýlerdi alyp tastaýǵa mindettendi.

Telstra, Optus jáne olardyń básekelesi TPG ótken jyly osyndaı kelisimderdi endi qaıtyp jasamaýǵa jáne uzartpaýǵa sot aldynda mindetteme alǵan.

Eske sala keteıik, buǵan deıin kıberqaýipsizdikke arnalǵan aqparattyq saıttyń habarlaýynsha, Apple, Facebook, Google, Telegram jáne keıbir memlekettik qyzmetterdegi akkaýnttarǵa kirýge múmkindik beretin álem boıynsha shamamen 16 mıllıard paıdalanýshy deregi buzylyp, bul tarıhtaǵy eń iri «derek aǵýy» oqıǵasyna aınalǵan edi.