Google aýdarmashy arqyly qazaq tilinde sózdi daýystap aýdarý qyzmeti iske qosyldy

NUR-SULTAN. QazAqparat – Google aýdarmashy arqyly qazaq tilinde sózdi daýystap aýdarý qyzmeti iske qosyldy. «Ulttyq aýdarma bıýrosy» qoǵamdyq qorynyń atqarýshy dırektory Raýan Kenjehanulynyń aıtýynsha, osy qyzmetti iske qosý úshin Google kompanııasymen 5 jyl boıy jumys júrgizilgen, dep habarlaıdy QazAqparat tilshisi.

«Dostar, tamasha jańalyq! Tilimiz Google aýdarmashynyń daýys arqyly aýdarý qyzmetine qosyldy. Bul bizdiń Google-men júrgizgen 5 jyldyq jumysymyzdyń nátıjesi. Ol úshin Google-ge san myń bet aýdarma mátin, qazaq tilindegi júzdegen saǵat aýdıo jazba, dybystalǵan tom-tom sózdik berdik. Google aýdarma qyzmeti - neıro júıeler negizinde damyp kele jatqan mashınalyq aýdarmanyń eń ilgerisi. Sondyqtan tildi saqtaý jáne ony damytý turǵysynan bul asa mańyzdy oqıǵa», - dep jazdy Raýan Kenjehanuly Facebook paraqshasynda.

Bul jaǵymdy jańalyqty jarııalaı otyryp, qor basshysy osy jobaǵa atsalysqan áriptesteriniń bárine alǵys aıtty.

«Bul bastamaǵa demeýshilik jasaǵan Beeline kompanııasy men Anar Jumaǵulova hanymǵa erekshe rızashylyq bildiremiz!» - deıdi ol.