Google ańyzy Pıter Norvıg Qazaqstannyń batyl qadamyn moıyndady
Jasandy ıntellekt salasynyń álemge tanymal ǵalymy, áıgili Google Research bólimshesiniń burynǵy basshysy, «Artificial Intelligence: A Modern Approach» oqýlyǵynyń teń avtory Pıter Norvıg Qazaqstannyń tehnologııa, bilim berý jáne ǵylym júıelerindegi reformalaryn joǵary baǵalady. Bul pikirin ol Qazaqstan Prezıdenti janyndaǵy JI (jasandy ıntellekt) damytý jónindegi keńeske qatysqannan keıin bildirdi.
Mádenıet jáne aqparat mınıstrliginiń málimetine súıensek, Norvıg Qazaqstanǵa Qytaıdyń ataqty kásipkeri ári sıngapýrlyq Sinovation Ventures ınvestıtsııalyq qorynyń negizin qalaýshysy Kaı-Fý Lı shaqyrýymen kelgen. Keńes jumysyna álemdik deńgeıdegi sarapshylar, úkimet músheleri, ǵalymdar men tehnologtar qatysty.
Pıter Norvıg óz sózinde bylaı dedi:
– Qazaqstan – munaıly memleket. Biraq bul el ekonomıkalyq qurylymyn jasandy ıntellekt baǵytyna batyl buryp otyrǵan sanaýly elderdiń biri. Bul – tarıhı transformatsııa. Eldiń demografııasy jas, jastar tehnologııaǵa óte yntaly. Bilim berý salasyna erekshe kóńil bólingen. Búginde Qazaqstanda 30-ǵa jýyq sheteldik ýnıversıtetterdiń fılıaldary jumys isteıdi. Aımaq úshin bul biregeı kórsetkish, - dedi Norvıg.
Mamannyń aıtýynsha, Qazaqstan ımmıgratsııa salasyndaǵy saıasatty durys qoldana bilgen. Elge sheteldik stýdentter aǵylyp kelip jatyr, al otandyq jastar halyqaralyq deńgeıdegi baǵdarlamalar arqyly básekege qabiletti maman bolyp ósýde. Onyń pikirinshe, mundaı tásil kadrlyq áleýetti kúsheıtýge jáne tehnologııalyq damýdy jedeldetýge múmkindik beredi.
Sondaı-aq sarapshy Qazaqstannyń startap ekojúıesine toqtaldy:
– Startaptarǵa kóbine venchýrlyq kapıtal emes, memlekettik granttar arqyly qoldaý kórsetiledi. Bul – ózge elderden ózgeshe, biraq tıimdi model. Qazirdiń ózinde alǵashqy «edınorogtar» (baǵasy 1 mıllıard dollardan asatyn startaptar) paıda bola bastady. Eń bastysy – Úkimettiń uzaq merzimdi, naqty baǵyty bar. Memleket qoǵamdy bul baǵyttyń durys ekenine sendire aldy, - dedi ol.
Onyń pikirinshe, Qazaqstan bıliginiń dáıekti saıasaty, tehnologııaǵa degen strategııalyq ınvestıtsııasy jáne ashyq dıalog ornatýǵa tyrysatyn saıası mádenıeti eldegi ınnovatsııalyq ortany jedel damytyp keledi.
Aıta keteıik, Pıter Norvıg – Kremnıı alqabynyń sımvolyna aınalǵan tulǵalardyń biri. Ol 2000–2012 jyldary Google-dyń izdeý júıesi boıynsha jetekshi ǵylymı-zertteý jumystaryn basqarǵan. Sonymen qatar, Stenford ýnıversıtetinde oqytýshy bolyp qyzmet atqarǵan, NASA-da jasandy ıntellekt jobalarymen aınalysqan. Onyń «Artificial Intelligence: A Modern Approach» oqýlyǵy álemniń 20-dan astam tilinde jaryq kórip, 150-den astam elde oqý baǵdarlamasyna engen.
Qazaqstanda sońǵy jyldary jasandy ıntellekt, tsıfrlyq transformatsııa taqyryptary memlekettik deńgeıde talqylanyp keledi. Memleket basshysy Qasym-Jomart Toqaevtyń bastamasymen JI damytý keńesi qurylyp, eldiń ekonomıkalyq bolashaǵyn tehnologııa arqyly kúsheıtý baǵytyndaǵy birqatar qujattar qabyldandy.
Buǵan deıin Qazaqstan Google Cloud jahandyq jelisindegi óńirlik habqa aınalatynyn jazǵan edik.