Gonkýr syılyǵy 10 jyl ishinde alǵash ret áıel adamǵa berildi
ASTANA. Qarashanyń 3-i. QazAqparat - 2009 jylǵy Gonkýr syılyǵyn 42 jastaǵy franko-senegal jazýshysy Marı Ndıaıe (Marie NDiaye) «Úsh qajyrly áıel» («Trois Femmes Puissantes») romany úshin aldy, dep habarlaıdy QazAqparat Agence France-Presse saıtyna silteme jasap.
Agenttiktiń atap aıtqanyndaı, sońǵy 10 jyl ishinde alǵash ret áıel adamǵa jáne syılyq tarıhynda tuńǵysh ret - qara násildi áıelge berilgen.
Synshylar jyly qabyldaǵan jáne bestsellerge aınalǵan «Úsh qajyrly áıel» romany úsh bólimnen turady jáne Afrıka men Batys Eýropa turǵyndarynyń qarym-qatynastary týraly áńgimeleıdi.
Marı Ndıaıe óziniń tuńǵysh romanyn 17 jasynda jarııalaǵan bolatyn. Ol sodan beri Frantsııadaǵy barynsha tanymal jazýshyǵa jáne stsenarııshige aınaldy.
