Gonkongtyń ulttyq áýe kompanııasy Qazaqstanǵa júk jáne jolaýshylar reısterin ashady
ASTANA. KAZINFORM — Gonkongtyń ulttyq áýe kompanııasy Cathay Qazaqstanǵa turaqty júk jáne jolaýshylar reısterin iske qosýdy josparlap otyr. Bul týraly Kólik mınıstrligi habarlady.
Kompanııanyń josparyna sáıkes, 2026 jylǵy 1 tamyzdan bastap «Boıng-747» ushaqtarymen Gonkong — Astana baǵyty boıynsha aptasyna bes retke deıin turaqty júk reısteri oryndalady.
Sondaı-aq 2027 jylǵy qańtardan bastap «Eırbas A330» ushaqtarymen Gonkong — Almaty baǵyty boıynsha aptasyna úsh ret turaqty jolaýshylar reısterin ashý kózdelgen.
Qazaqstan tarapy jańa baǵyttardy iske asyrý úshin qajetti qoldaý kórsetýge daıyn ekenin málimdedi. Qazirgi ýaqytta reısterdi ashýǵa qajetti rásimder júrgizilip jatyr.
Jańa áýe baǵyttarynyń iske qosylýy Qazaqstan men Gonkong arasyndaǵy saýda-ekonomıkalyq jáne týrıstik baılanystardy nyǵaıtyp, logıstıkalyq múmkindikterdi keńeıtýge yqpal etedi.
Aıta keteıik, Cathay — Gonkongtyń ulttyq áýe kompanııasy jáne Azııadaǵy eń iri halyqaralyq áýe tasymaldaýshylarynyń biri. Kompanııa enshiles kásiporyndarymen birge 237 áýe kemesin paıdalanady jáne 100-den astam baǵytqa jolaýshylar tasymaldaıdy. Al Cathay Cargo 41 baǵyt boıynsha turaqty júk reısterin oryndap, jyl saıyn 1,67 mıllıon tonnadan astam júk tasymaldaıdy.
Eske salaıyq, buǵan deıin Aqtaýdan Úrimshige jáne Astanadan Ystyqkólge tikeleı reıster ashylǵanyn jazǵanbyz.
