Gonkongtyq kompanııalar Qazaqstandaǵy «jasyl» energetıka jobalaryna qyzyǵýshylyq tanytty
ASTANA. KAZINFORM – Qazaqstan Respýblıkasy Premer-Mınıstriniń orynbasary Qanat Bozymbaev Towngas jáne Full Vision Capital gonkongtyq kompanııalarynyń delegatsııasymen kezdesý ótkizdi, ony Full Vision Capital basqarýshy seriktesi, Towngas atqarýshy dırektory jáne ınvestıtsııalar jónindegi dırektory Alan Chan bastap keldi.
Kelissózder barysynda taraptar «jasyl» energetıka, turaqty avıatsııalyq otyn, zamanaýı elektr energııasyn jınaqtaý júıeleri jáne Alataý qalasyn damytý salasyndaǵy birlesken ınvestıtsııalyq jobalardy iske asyrý perspektıvalaryn talqylady.
Qanat Bozymbaev Qazaqstannyń energetıkalyq aýysý saıasatyn dáıekti túrde iske asyryp jatqanyn jáne halyqaralyq ınvestorlar men ozyq tehnologııalardy tartýǵa múddeli ekenin atap ótti. Jobalardy oqshaýlaý úshin basym alań retinde Alatau City aýmaǵy belgilendi, onda ınvestorlar úshin turaqty jaǵdaılardy, salyqtyq jáne kedendik preferentsııalardy, sondaı-aq jobalardy «bir tereze» qaǵıdaty boıynsha súıemeldeýdi kózdeıtin arnaýly quqyqtyq rejım áreket etedi.
Kelissózder barysynda taraptar derekterdi óńdeý ortalyqtary men synı ınfraqurylym obektilerin senimdi energııamen jabdyqtaýdy qamtamasyz etý úshin suranysqa ıe bolýy múmkin EnerVenue elektr energııasyn uzaq merzimdi saqtaý tehnologııalaryn Qazaqstanda engizý perspektıvalaryn qarastyrdy. Sonymen qatar, EcoCeres tehnologııalary negizinde turaqty avıatsııalyq otyn (SAF) óndiretin zaýyt salý jobasyn iske asyrý múmkindikteri, sondaı-aq aýyl sharýashylyǵy ónimderi men qaldyqtardy qaıta óńdeý máseleleri talqylandy.
Kezdesýge qatysýshylar jańartylatyn energetıka salasyndaǵy jobalardy damytýǵa jáne Towngas Smart Energy sheshimderin, onyń ishinde shatyrdaǵy kún elektr stantsııalary men zııatkerlik energetıkalyq júıelerdi engizýge erekshe nazar aýdardy. Zamanaýı turaqty qala retinde qurylyp jatqan Alatau City osyndaı tehnologııalardy keshendi túrde engizip, keıinnen tabysty sheshimderdi Qazaqstannyń basqa óńirlerinde masshtabtaý úshin pılottyq alań bola alatyny atap ótildi.
Towngas jáne Full Vision Capital kompanııalary «jasyl» ekonomıka salasyndaǵy jetekshi halyqaralyq oıynshylardyń qataryna kiredi. Towngas – tarıhy 160 jyldan asatyn Gonkongtyń eń iri gaz jáne energetıkalyq kompanııasy, ol Qytaıda 100 mıllıonnan astam tutynýshyǵa qyzmet kórsetedi jáne turaqty avıatsııalyq otyn, elektr energııasyn jınaqtaý, jańartylatyn energetıka jáne jartylaı ótkizgish tehnologııalar salasyndaǵy jobalardy damytady. Full Vision Capital energetıkalyq aýysýǵa jáne turaqty damýǵa baılanysty joǵary tehnologııalyq jobalarǵa ınvestıtsııalar salýǵa mamandanǵan.
Kezdesý qorytyndysy boıynsha taraptar uzaq merzimdi yntymaqtastyqty damytýǵa ózara múddeliligin rastady jáne ınvestıtsııalyq jobalardy naqty pysyqtaýdy jalǵastyrýǵa kelisti.
Aıta keteıik, Qytaı–Qazaqstan logıstıkalyq bazasy qurylǵaly 8 myńnan astam poıyz qabyldady.
