Gonkongte órt shyqqan ǵımarattyń ishinde 300-den astam adam qalyp qoıdy
GONKONG. QazAqparat – Gonkongte kóp qabatty ǵımaratta sársenbi kúni órt shyǵyp, onyń joǵarǵy bóliginde shamamen 350 adam qalyp qoıǵan, dep habarlaıdy QazAqparat Dimsum Daily jańalyqtar portalyna silteme jasap.
Portaldyń habarlaýynsha, osy saǵatqa deıin 165 adam ǵımarattan evakýatsııalanǵan. Júzge jýyq adam besinshi qabattaǵy ashyq platformada, 350 adam shatyrda qalǵan.
Sońǵy derekter boıynsha, segiz adam zardap shekken.
Órt Gonkong aralyndaǵy Kozýeı-beı aýdanynda ornalasqan Dúnıejúzilik saýda ortalyǵynyń (World Trade Center) ǵımaratynda túski úzilis kezinde tutanǵan. Bul týraly alǵashqy habar 12:37-de túsken. Qazirgi kezde órt sóndirýshiler órtti bes deńgeıdiń ishinde úshinshisine baǵalap otyr.
38 qabatty munaranyń tómengi bóliginde dúkender men meıramhanalar, al joǵary bóliginde keńseler ornalasqan. Jerasty turaǵynan besinshi qabatqa deıin jóndeý jumystaryna baılanysty jabyq bolǵan, atalǵan qabattardaǵy saýda núkteleri jumys istemegen. Kelýshiler úshin altynshy qabattan 13-qabatqa deıingi meıramhanalar, sonymen qatar 14-qabattan 38-qabatqa deıingi keńseler ashyq bolǵan.
Órt birinshi qabattaǵy tehnıkalyq bólmede tutanǵan bolýy múmkin, ol jerden jalyn qurylys aǵashtaryna qaraı ótken.
