Gonkongte Marsty ıgerý úshin qurylys materıaly ázirlendi
ASTANA. KAZINFORM — Gonkong ǵalymdary genetıkalyq túrlendirilgen ashytqy, jelatın jáne qumnan Marsta ǵımarat salý máselesin sheshe alatyn «tiri» qurylys materıalyn daıyndady, dep habarlaıdy Kazinform agenttiginiń Beıjińdegi menshikti tilshisi SCMP-ke silteme jasap.
Gonkong ǵylym jáne tehnologııa ýnıversıtetiniń professor Tsıý Tszıshen bastaǵan ǵalymdar toby men Gonkong polıtehnıkalyq ýnıversıtetiniń ǵalymdary jasaǵan materıal Jerden qurylys materıaldaryn qymbatqa tasymaldaýdy jáne Mars topyraǵyn óńdeýge kóp energııa jumsaýdy qajet etpeıdi.
Zertteýshilerdiń aıtýynsha, bul energııany az qajet etetin kompozıt Mars jaǵdaıynda 3D basyp shyǵarýǵa ábden qolaıly. Synaq barysynda onyń ońtaılandyrylǵan quramy 12 megapaskalǵa jýyq qysý beriktigin kórsetti, bul Jerdegi standartty qurylys materıaldarynyń sıpattamasyna tolyq sáıkes keledi.
— Eger Marstaǵy metan, kómirqyshqyl gazy men muz kúıindegi sýdy organıkalyq jelatınge nemese qorektik zattarǵa aınaldyrý múmkin bolsa, onda Jerden jetkiziletin júkke táýeldilik teorııalyq turǵydan nólge deıin tómendeıdi, — dedi Tsıý Tszıshen.
Mundaı bıomaterıaldyń bir tekshe metrin óndirýge kún paneliniń bir saǵattan az ýaqyt jumys isteýi jetkilikti, al Mars topyraǵynan kirpishterdi termııalyq ádispen kúıdirip shyǵarýǵa birneshe kúnge deıin ýaqyt ketýi múmkin.
Jańa materıaldy birneshe ret qaıta óńdeýge bolady. Ony Jerde de, mysaly, Antarktıdadaǵy zertteý stantsııalaryn salýǵa paıdalanýǵa múmkindik bar.
Buǵan deıin Qytaıdyń Marstan ákelinetin topyraqty zertteıtin arnaıy zerthana turǵyzatyny habarlanǵan bolatyn.
