Gonkongtaǵy qaqtyǵystardan 56 adam zardap shekti
ASTANA. QazAqparat - Gonkongta úkimetke qarsy kóterilis kezinde 56 adam zardap shekti. Kóterilgen toptyń negizgi kúshin stýdentter qurady, dep habarlady CNN.
Gonkongtyń ortalyǵyn jaılaǵan kóterilisshiler polıtsııanyń qorshaýynda qalýdan qaýiptenedi. Olar beterine betperde, kózderine qorǵaıtyn kózildirik, ústerine jańbyrdan qorǵaıtyn jamylǵy kıip alǵan. Kóterilisshiler qalanyń ortalyq iskerlik aýdanyna aparatyn basty magıstraldaǵy lagerdi qıratty. Úkimet bitistirý sharalarynyń aıasynda kóterilis bolyp jatqan aýdandardan arnaıy jasaqtyń shyǵarylǵanyn málim etti. Bıliktegiler sherýshilerdi taraýǵa jáne kóshelerdegi qozǵalysty ashýǵa shaqyrdy. Alaıda kompartııa bıligine qarsy kóterilgender taraýdan bas tartqan. Sherýshiler demokratııalyq saılaýdyń ótkizilýin talap etip otyr: olar Qytaı bıliginiń 2017 jyly ótetin saılaýǵa úmitkerlerdi ózderi tańdaıtynyna narazy. 28 qyrkúıekte polıtsııa sherýdi taıaq, kózden jas aǵyzatyn gaz ben aerozolderdi qoldaný arqyly baspaq boldy, biraq sherýshilerdi tarata almady. Jappaı kóterilisti «Okkýpaı Sentral» toby bastaǵan . Onyń kóshbasshylarynyń aınalasyna myńdaǵan kóterilisshiler jınaldy.
Áleýmettik jelilerde atalmysh jappaı qarsylyq qozǵalysyn «qolshatyrlar tóńkerisi» dep ataýda, sebebi 30 gradýs ystyqtan qorǵaný úshin kóptegen qatysýshylar qoldaryna qolshatyr ustap alǵan, ony polıtsııa shashatyn aerozolden qorǵaný úshin ustap alǵandar da bar.
