Gonkongtaǵy ereýil kezinde 2 qazaqstandyq kómekke júgindi – QR SІM

NUR-SULTAN. QazAqparat – Gonkongtaǵy ereýil kezinde QR Syrtqy ister mınıstrligine Qazaqstannyń eki azamaty júgingen, dep habarlaıdy QazAqparat tilshisi.

Bul týraly QR Syrtqy ister mınıstrliginiń resmı ókili Aıbek Smadııarov málimdedi.

«Kómek surap habarlasqan birinshi azamat sherý bolǵan kósheler arqyly áýejaıǵa jetkizýdi surady. Biz oǵan kómek kórsettik. Ekinshi azamat telefon arqyly habarlasyp, Eır Astana áýe kompanııasynyń «Almaty - Gonkong» reısi týraly aqparat surady», - dedi A. Smadııarov QR SІM ótken brıfıngte.

Onyń aıtýynsha, ázirge barlyq reıs qalpyna keltirilgen jáne kestege sáıkes ushyrylýda. Qazaqstandyqtar esh kedergige ushyrap jatqan joq.

Buǵan deıin de Gonkongtaǵy (QHR) jaǵdaıdyń shıelenisýine jáne jappaı narazylyq aktsııalarynyń jalǵasýyna baılanysty Qazaqstannyń Gonkongtaǵy Bas konsýldyǵy bizdiń azamattarǵa qalada qalyptasqan tótenshe jaǵdaıdy eskertken edi.

Ondaǵy narazylyq maýsym aıynyń basynda kóterildi. Ereýilge shyqqandar Gonkongtaǵy quqyq búzýshylardy qurlyqtyq Qytaıǵa ekstradatsııalaý týraly zań jobasyna qarsy.